1679/2026-2027

Lunglei, 2026 Thlazing ni 6: Mizoram State AIDS Control Society (MSACS) bul tumin District AIDS Prevention & Control Committee (DAPCC), Lunglei District leh School Education Department & Samagra Shiksha, Lunglei District te ṭang kawp huaihawtin Lunglei District Level Red Ribbon Quiz Competition 2026 chu vawiin khan School Education Complex Conference Hall, Lungleiah buatsaih a ni a. Lunglei District-a sikul pariat inelin, Loroto Play School, Lunglei chu pakhatna an ni.

Lunglei District Bawrhsap Pi Navneet Mann chuan District Level Red Ribbon Quiz Competition lawmman semna hun hmanpuiin, MSACS-in kum tin zirlaite puala quiz competition an buatsaih ṭhin chu HIV/AIDS hlauhawmzia leh a pawi dan te, HIV/AIDS kai lo tura inven dan leh a veite enkawl chungchang te zirlaite'n an hriat theihna hmanraw pawimawh tak a nih thu a sawi a. Red Ribbon Quiz Competition-ah kum tin sikul hrang hrang phur taka an tel ṭhin chu lawmawm a tih thu sawiin, Mizoram chu HIV/AIDS hluarna a nih avangin zirlai aṭanga puitling thlengin kan dinhmun hriat chian a, inven dan leh inenkawl dan kan inzirtir zel a ṭul thu a sawi a. Zirlaite chu an nun uluk a, HIV/AIDS laka inveng tur leh a dona kawngah ṭan la zel turin a chah.

Lunglei District Education Officer Pu Micky R. Lalenkawla'n hun kaihruaiin, Lunglei District AIDS Control Officer Dr K. Lalhmachhuana'n Red Ribbon Quiz Competition buatsaih chhan leh report tlangpui a sawi a. Inelna buatsaih chhunzawm niin, school level competition aṭanga ti ṭha zual sikul 8 an inel a. Tlai lamah lawmman semna hun buatsaih chhunzawm niin, Bawrhsap Pi Navneet Mann bakah, Sub-Deputy Commissioner Pu Deepak Godara, IAS leh DACO Dr K. Lalhmachhuana te'n lawmman hi a dawngtute kutah an hlan.

Lunglei District Level Red Ribbon Quiz Competition-ah hian heti ang hi result dinhmun a ni:

1-na – Loroto Play School, Lunglei

2-na – Sacred Heart School, Lunglei

3-na – F. Lalkhama Memorial School, Lunglei

Consolation Prize –

(1) Baptist English School, Serkawn

(2) One Heart Academy, Lunglei

(3) 2nd Bn MAP English Medium School, Luangmual

(4) Baptist English School, Lungrang South

(5) Government Leitlangpui High School, Lunglei

District Level Red Ribbon Quiz-a pakhatna hian ₹8,000, pahnihnain ₹5,000, pathumnain ₹3,000 leh Consolation Prize dawngtute'n ₹1,000 ṭheuh leh certificate an dawng a. Pakhatna leh pahnihna te hi nomawi (trophy) pek tel an ni bawk.

Red Ribbon Quiz Competition hian a tum ber chu ṭhalai kum 13–17 inkar zirlaite hnenah HIV/AIDS chungchang leh mipat hmeichhiatna hman khawlohna aṭanga natna inkai chhawn theih chungchang zirtir a, an fihlim theihna tur kawng kawhhmuh a ni a. District level-a inel tur hian July ni 23, 2026 khan online mode-in School Level Red Ribbon Quiz Competition buatsaih a ni a. Hetah hian sikul 65 lai telin, chu'ng zinga a ti ṭha pariat chu district level-ah hian an intihsiak leh a ni.

District level intihsiaka pakhatna te hi September 2026-a state level intihsiaknaah district ai awhin an tel leh dawn a. An tih ṭhat dan azirin regional leh national level thlengin an tel thei dawn a ni.