1680/2026-2027

Serchhip, the 6^th August, 2026: Serchhip DC Meeting Hall-a thutkhawm-ah hian Serchhip Add. DC Pi Dorothy Muansangi chuan Serchhip District chhunga National Highway-54 Inspection an neih dan tarlangin, kumin July 15 leh 17 te khan Serchhip district kawngpui National Highway-54 hi a hmunah enfiah a nih thu District Bawrhsap hnenah thehlutin, NHIDCL-a PMU Seling leh Lunglei hnenah thehluh leh a nih thu a sawi a. Heng kawng tha tawk lo leh siamthat ngaite hi Contractor-te hnenah an siamthat dan tur ruahmanna siampuiin, chuta an hmalak zui dante thlir tura thutkhawm hi koh a nih thu a sawi bawk.

He thutkhawmah hian NHIDCL aiawhte bakah Serchhip District chhunga National Highway-54 siamthat hna thawktu Shivalaya, KRAM Infracon Pvt. Ltd. leh Bhartia Infra Projects Ltd.  aiawh ten hma an laknate tarlangin zawhfiah duh an neihte zawhfiah nghal a ni bawk. 

Serchhip District Bawrhsap, Pu Paul L. Khuma chuan Serchhip District chhunga National Highway-54 Inspection neih a nih hnuah hmalakna a chak lo hle tih sawiin, chak zawka hmalak a tul thu a sawi a. Kawngpui siamthat hna vil zui kawngah tlawmngai pawl leh thuthar thehdarhtute bakah khawtlang hruaitu leh mipuite tanrual a tul thu a sawi a. Kawngpui siamthat hna hi ni 15 chhunga beisei anga an thawk tha lo a nih chuan Dan anga khawng taka hmalak zui a nih tawh tur thu pawh Contractor te, Authority Engineer leh NHIDCL hotute hi a hriattir nghal bawk a ni.