3948/2024-2025

Dated Kolasib the 24th January, 2025: Vawiin chawhnu khan Kolasib DC Conference Hall ah kan hma Village Council Election 2025 lo awm tur atana Kolasib District a Observer atana ruat Official pahnih te leh thuthar lakhawmtute an inkawm a. He hun hi Pu Robert C Lalhmangaiha, District Election Officer chuan a hmanpui a ni.

Vawiin a thutkhawmna ahhian District Election Officer chuan Observer lokal te chu chibai bukna a nei a. Kolasiba inthlanna felfai tak a a awm theihna turin Election office atang chuan puih an ngaihna apiangah pui tura an inpeih reng thu a sawi a. Zalen taka an hna thawk turin duhsakna a hlan bawk a ni.

He hunah hian Pu Alan Lalthanzara, Observer chuan thutawi sawina leh inhmelhriattirna a nei a. Observer te chu inthlanna a va inrawlh tur ni lovin, State Election Comission mit leh beng niin, Election felfai takin a kal em tih leh mamawhte a awm em tihte lo en thlithlai a report pe tu tur an nih thu a sawi a. Kolasib chu hmun ralmuang leh critical polling station awm lohna a nih avangin inthlan pawh felfai taka an kalpui theih a beisei thu a sawi . Election chungchanga zawh duh emaw hriatchian duh nei an awm anih chuan engtiklai pawh in an in hawn reng thu a sawi bawk a ni.

Kolasib District ahhian VC election 2025 atan hian Observer pahnih ruat an ni a, chungte chu Pu Alan Lalthanzara , Deputy Secretary, GAD leh Pu Isaac C  Lalrempuia, Deputy Secretary DP&AR te an ni. Kolasib District hi zone hnih ah then niin East zone ahhian Polling Station 23 a awm a, Pu Isaac C Lalrempuia hian a chang anga, West Zone ,Polling Station 37 awmna hi Pu Alan Lalthanzara hian a chang ve thung dawn a ni.

Vawiina thutkhawmna ahhian District Eelection officer, Observer te, Election Officer leh thutharlakhawmtute bakah ZPM,MNF leh Congress Party aiawhte an tel a ni.