No.911/2021-2022

Kolasib dated 11th June 2021: Tukin khan Regional Sports Training Center, Saidan, Kolasibah Green Mizoram Day pual a thingphunna hun buatsaih a ni a. Pu K.Lalrinliana, Minister of State, Foods, Civil Supplies & Consumer Affairs Department chu khuallian niin Pu Thomas D.Lalengliana, President, Sub-Hqrs YMA Kolasibin hun a kaihruai a. Dr.H.Lalthlangliana, Deputy Commissioner, Kolasib district chhung a Head of Office-te leh NGO hruaituten thing phunna hun an hmang nghal bawk a ni.

Supply Minister Pu K.Lalrinliana chuan mihringte leh nungchate dam khawchhuak nan boruak thinghlim siam turin ram ngaw humhalhna kawngah hmalak tharna kalpui a pawimawh thu sawiin thingphun uar zawk a kalpui nan leh rawm ngaw humhalh pawimawh zia chhinchhiah nan Green Mizoram Day chu buatsaih a nih thu a sawi. Mizoram leilung hausakna humhalhna tur a lo vah (Shifting cultivation) tih tlem a, lo neih dan ngelnghet ruahman tumin hmalakna hrang hrang kalpui thin a nih thu Minister chuan tarlangin ram ngaw kan neih sa humhalh leh ram ngaw siam belh chu boruak thianghlim siamna, nungchate humhalhna leh tui hna humhalhna hmanraw pawimawh tak a nih thu a sawi bawk a ni.

Pi N.Viji, DFO chuan kum 2020 chhung a thing phunna kawnga an hmalakna thenkhat tarlangin sawrkar department hrang hrangah thing tiak 369 phun a nih thu te, mimal ram a phun tur 382 sem chhuah a nih thu leh Agriculture department hmalakna a FOCUS kaltlangin khaw 12 ah thing phun beihpui kalpui a nih thu a sawi a. Kolasib Forest Division chuan kum 2021 chhung hian thing tiak 21,290 phun tur a hmalak tum a nih thu a sawi bawk a ni.

Kolasib district chhung khaw hrang hrang a kangmei chhuak tur ven kawng a hma la țha khua thlanchhuah 3 hnenah lawmman semna hun hman a ni a, Pakhatna hi Thingthelh khua niin pahnihna hi Khamrang an ni a, N.Chhimluangin pathumna dinhmun an hauh bawk a ni. Pakhatna hian cheng sing nga a keng tel a, pahnihna leh pathumna hian cheng sing thum leh cheng sing hnih a keng tel bawk a ni.

Supply Minister hian nimin tlai dar 4 vel a ruahsur avanga District Jail, Kolasib hungna bang chim chu a hmunah a endik nghal a, harsatna a thlen loh nan a tul ang anga thawm that hna kalpui turin thawktute a chah a, rem that hna tan hmaa a tul anga tih phui lailawk rih a nih theih nan hnatlangte thingpui inna tur pawisa a pe bawk a ni.