1992/2025-2026

Dated Kolasib the 4th September, 2025 : Vawiin chawhma dar 11:00 khan Kolasib DC Conference Hall-ah Inner Line Permit(ILP) pek chhuah dan chungchangah Training neih a ni a. He hun hi Dr. Andrew H. Vanlaldika, MCS, Addl. Secretary, Home Department chuan a kaihruai a ni.

Dr. Andrew H. Vanlaldika chuan Mizoram in hmasawnna rahbi a pen a, State luhka a hawn zauh rual hian ram chhung mipuite chanvo humhim a pawimawh a ni, a ti a. September ni 13 a Mizoram chhunga Rail Station hawn belh turah pawh Mizoram Sawrkar leh Home Department chuan dan lova State dang atang rawn lutte ven kawngah theih tawp chhuah an tum thu a sawi a. Mizoram chhunga cheng mipuite dikna chanvo humhalh hna chu ram chhung mipui tinte kutah a awm thu sawiin Sawrkar in ram hmakhua ngai a, dan leh inkaihhruaina a siamte chu zawm tlat a pawimawh thu a sawi bawk.

He hunah hian Kolasib Deputy Commissioner Pu Robert C. Lalhmangaiha chuan thusawina hun hmangin Kolasib District chhunga ILP Check Gate dinhmunte tarlanna hun a hmanga. Vairengte leh Bairabi Sub-Division chhungah District Administration Office hmalakna in ILP Check Gate pakhat ve ve a awm thute, Saihapui 'V' leh Phaisen a Police Duty Post-ah ILP enfiah hnathawh a nih thu a sawi a. Heng ILP Check-na hmunah te hian fimkhur takin State pawn atanga rawn lut turte Documents enfiah a nih thin thu a sawi bawk.

Mizoram chhungah September ni 13 hian Rail Station thar hawn belhin Rail Service Sihhmui, Aizawl thleng in a kal dawn a. Hemi avang hian Mizoram chhunga Rail Station hmun nga(5) Sihhmui, Mualkhang, Kawnpui, Hortoki leh Bairabi ah te Inner Line Permit (ILP) uluk zawk a pehchhuah a tul tiin Mizoram Sawrkar chuan a ngai pawimawh hle a. Vawiin a Kolasib DC Conference Hall-a ILP pekchhuah kawnga Training neihna ah pawh hian; ILP Guidelines-te, hmalak ngai leh hriattur pawimawhte sawihona neih a ni.

He hunah hian Pu F. Zodinpuia, Superintendent, Home Department bakah Rail Station a Police Duty turte leh Kolasib Deputy Commissioner Office a thawktu pawimawhte an tel a ni.