No.7765/2020-2021

Dated Kolasib the 11.3.2021 : Kolasib District-a COVID-19 Vaccine pek chhuahna kal zelah vawiin khan kum lama upate leh natna benvawn neite tan Vaccine pek tan a ni. COVID-19 hripui laka kan lo him theih nan ngawrh takin Mizoram hmun hrang hrangah Vaccination hi kalpui mek a ni a, Kolasibah pawh vawiin khan Chief Medical Office hmalaknain kum lam a upa, kum 60 leh a chunglam chin te bak ah natna benvawn nei (Comorbid) - te tan Vaccine hi pek tan a ni a. Vaccination pekna hmun hi Govt. Primary School – I, Banglakawn niin, vawiin hian mi 655 ten Vaccine la thei tur a ruhmanna siam a ni. 

Kolasib District-a Vaccination kalpui mekah hian sawrkar laipuiin dan zawm tur a siam anga felfai taka Vaccine pek a nih theih nan ruahmanna siam a ni a. Veng inkalchhawk dan tur siam niin vawiin hian Kolasib Venglai, Venglai East leh Project Venga mi ten Vaccination hi an la a, naktukah Diakkawn leh College Veng a kum lam a upate leh natna benvawn nei mi 408 te hnenah Vaccine hi pek chhunzawm leh tur a ruahman a ni bawk. COVID-19 Vaccine la zawng zawngte hi COWIN Application hmanga chinchhiah vek niin, hriatchian duh nei emaw harsatna neite tan Helpline No: 8974768957 ah hian engtik lai pawn biak theih reng a ni. 

Hriattheih chinah COVID-19 Vaccine vanga hriselna lama harsatna lian tham Report dawn a lo awm lova. ‘Vaccine lak zawh a mi thenkhatten khawsik an neih thin chu hlauh tur a ni lova, Vaccination hnathawh pakhat ve reng a ni’ tiin District Immunization Officer, Dr. RK Lalthlamuana, SMO, Kolasib District Hospital chuan a sawi.

Kolasib District-a COVID-19 Vaccine pek tawh zawng zawng hi mi 2,496 an ni tawh a. Health Care Worker mi 711 ten Vaccine 1st Dose la tawhin, chung zing atang chuan mi 604 te 2nd Dose an la leh tawh a. Frontline Worker mi 1,785 ten 1st Dose an la tawh bawk a ni. Vawiin a COVID-19 Vaccine la zawng zawng hi mi 332 niin, kum 60 chin mi 316 leh natna benvawn nei mi 16 te hnenah Vaccine pek a ni.