No.7764/2020-2021

Dated Hnahthial, the 11th March, 2021: Hnahthial District Bawrhsap thar Pu H. Dolianbuaia chuan vawiin khan a Office Chamber-ah Hnahthial-a MJA member-te chu inhmelhriatna thingpui inpui-in thawhho puiah a sawm a ni.

Ram leh khawtlang inrelbawlna kawngah Press mite chu lungthu pawimawh tak an nih thu sawiin District bawrhsap Pu H.Dolianbuaia chuan "Hnahthial District hmasawn zelna turah pawh hian kei leh Office Staff-te thawhhona ringawt hi a tawk zo lova, Chanchinbu mite leh Tlawmngai pawl ten thawhhona tha kan neih ka duhin ka beisei a ni" tiin Covid-19 hrilengin ram sum leh pai dinhmun nghawngin harsatna awm mahse Sorkar chuan District thar tih changtlun zel a duh a, District Rural Development Agency (DRDA) pawh Hnahthial-ah hawn thuai tum a nih thu a sawi a ni. 

Zirna chu a ngaih pawimawh hmasak a nih thu leh Hnahthial District-ah Zirna boruak tha a awm thar theih nan ruahmanna siam a nih dawn thu District Bawrhsap chuan a sawi bakah Hriselna leh Faina kawngah hmalak nasat zual tum a nih thu a sawi a, "District Fai ber nih kan tum tur a ni" a ti a. Mihring pung zelah Hnahthial chu District a nih tawh avangin tunhma aiin kawng hrang hrangah a than nasat dawn thu leh tun atanga ruahmanna tha neih a tul thu a sawi bawk a ni.

Hnahthial District tih changtluna tur kawnga ruahmanna kal mekte District Bawrhsap hmasain ziaka a dah fel thlap chu lawmawm a tih thu leh theihtawp a bawhzui zel a nih tur thu Pu H.Dolianbuai chuan a sawi bawk a ni.

He hunah hian MJA Hnahthial President Pu F.Zosangliana chuan District Bawrhsap tharin MJA a ngaih pawimawhna a lantir chu lawmawm a tih thu leh a hmalakna kawng hrang hrangah MJA in puih ve theihna an nei a nih chuan an inhuam reng thu a sawi bawk a ni.