No.7763/2020-2021

Dated Lunglei, the 11th March, 2021: Vawiin khan Lunglei District Bawrhsap Pu Kulothungan A, IAS chuan a office chamber-ah Lunglei media mite kawmin inhmelhriatna hun an hmang a, Lunglei District hmasawnna tura hmalakna hrang hrang te a sawipui bawk.

Pu Kulothungan A chuan khawvelin Journalist te hi a ngai pawimawhin a ngai hlu em em a, 'The Fourth Estate' tih hiala koh niin kan ram inrelbawlna Democracy vawngnung zel turin an pawimawh takzet a ni, a ti a. Sawrkar hmalakna hrang hrang puanzar kawngah leh Department-te finchhuah kawngah media mi te chu kawng tinrenga thawhho pui a duh thu sawiin a tha zawnga mipuite kaihruaitu leh ram hmasawn zelna tura kawng kawhhmuhtu ni zel tura tan la turin a chah.

Lunglei District ti hmasawn zel tura chak taka ke pen a tum thu Lunglei DC thar chuan sawiin Thenzawl SDO(C) anih laia a hmalakna pakhat 'Go To The People' (Mipui hnenah kal rawh) chu kalpui zel tura ruahmanna siam mekin a zau thei ang bera District fan chhuaha,mipui te mamawh zirchianga theihtawpa hmalak sak a tum thu a sawi a. Indo-Bangladesh border trade kalpuina hmun tur Kawrpuichhuah,Tlabung pawh karleh lama tlawh nghal a tum thu a sawi. Corporate Social Responsibility kaltlanga District chhunga hmalak theih te pawh kan bawhzui zel dawn a ni, a ti bawk.

Lunglei District MJA President Pu H. Lalthansanga leh member dangte pawhin thu sawiin an thil ngaih pawimawh leh mamawhte DC hnenah an thlen a, ram leh hnam, District hmasawnna tura lungrual taka hmalak tlan an duh thu an sawi a. Media mi te nena inhmelhriatna hun tha tak a buatsaih avangin DC chungah lawmthu an sawi a, media mite tana inhawng taka hnathawk duh mi a nih naah a chungah lawmthu an sawi bawk. Inkawmhona ah hian zirna, hirselna, sumdawnna, hmasawnna ruhrel leh kawng hrang hranga Lunglei District dinhmun te an sawiho.