2220/2024-2025

Dated Kolasib the 26th September 2024: Kolasib District Land Owner's Association Joint Action Committee bultumin fourlane kawngpui laih turin a tihchhiat ram neitute chuan sorkara an thilphut tihhlawhtlin ngiata kawng an dan chu Kolasib DC leh SP te nen inbiakna an neih hnuin nimin dar 3:30 PM khan an titawp.

Sethawn-a kawngpui danchah hi zing dar 8 vel aṭangin kalpui niin kawng hi dan chah a ni a, district thuneituten an thil ngiat te sorkarin a hriatpui thu leh theihtawp chhuaha hmalakna kal mek a nih thu hrilhin kawng dan chu titawp turin an ngen a ni. Chawhna dar 11 hnu deuhah security duty te chuan kawngpui tihtlang an tum a, duty ten an remtihloh avangin hun engemaw chen an innawr zui a ni.

Lungawilo te leh police te an innawr hnu hian District bawrhsap Pu Robert C Lalhmangaiha leh Kolasib SP Pu David H Lalthangliana te chu an thleng ve nghal a, bawrhsap chuan Supreme Court-a thu awm mek a nih vangin nghak tur leh an thil phutte chu sorkar hotu lian zawkah thlen a nih thu a sawi a, a hlawhtlin theihnan Chief Secretary kaihhruaia an thil ngiatte chu  ngaihtuah nghal a nih dawn thu a sawi a, kawngpui an dan pawh chawlhsan turin a ngen bawk a ni.

Ram neitute pawhin bawrhsapin a ngenna chu zahawm an tih thu an sawi a, hemi hnu hian bawrhsap ngenna ngaihtuahin road block an kalpui mek chu nimin chawhnu 3:30 khan tihtawp a nih thu puan a ni.

An thil phut zingah fourlane in a paltlang tur ram neitu nihna chinfel te, RRF notification 1965 țhiah te, fourlane project tihpuitlin leh kum 3 chuang hma la thei lova sorkarin an ram a khuahkhirh sut te a ni.