2219/2024-2025

Dated Hnahthial, the 26th September, 2024: Vawiin zing dar 7 khan Hnahthial District-ah UD&PA leh ICDS bultumin Swachhata Hi Seva 2024 leh Poshan Maah pualin 'Swachhata Run cum Poshan Walk' chu neih a ni.

'Swachhata Run cum Poshan Walk' hawnna hun hi Hnahthial Bawrhsap, Pi Rita Lalnunmawii Pachuau chuan neiin he hun ngaihlu a kalkhawm zawng zawngte hnenah lawmthu sawiin faina thuchah a sawi a. Bawrhsap chuan Hnahthial district chu mikhual leh zin veivak te tan pawh a hriatreng tlak khawp a district fai leh awhawm a siam theitu chu he huna kalkhawmte mai bakah a khaw mipui tinte chu an nih thu sawiin kawng engkimah fai tur chuan mimal tin an pawimawh thu a sawi a. Fai tak tak tur chuan thawk leh khata phur thut thil tih chi a nih loh thu sawiin kan nitin nunah kan beh tir a pawimawh a ni a ti a. Kalkhawm YMA branch hrang hranga thalaite chu faina kawnga a pawimawh berte leh a sulsutu berte zing ami an nih thu sawiin Hnahthial changkan nan leh fai nan theihtawp chhuah theuh turin leh midang a tam thei ang ber faina kawnga inhrilhhre turin a chah a ni.

'Swachhata Run cum Poshan Walk' hi Marathon anga kalpui niin Hnahthial YMA branch pakua- Bazar, Peniel, Lungleng, Chanmari, Venglai, Model, Kanaan, Electric leh Electric North tin atang member thahnem tak bakah ICDS mi leh sa te an tel a. Marathon hi DC Complex atang Bawrhsap chuan flag off in Hnahthial District Football Association (HDFA) turf ground thleng tlan a ni.

He intlansiakna hi 3 km vela thui tlan niin pakhatna atanga pathumna thleng lawmman sem a ni a. A hnuaia tarlante hi lawmman dawngtute chu an ni.

Pakhatna : Lalhruaitluanga, Model Veng YMA branch ( Lawmman : Rs 3000)

Pahnihna : Rodinmawia, Bazar Veng YMA branch ( Lawmman : Rs 2500)

Pathumna: Malsawmzuala, Peniel Veng YMA branch ( Lawmman : Rs 2000)

Hei bakah hian YMA branch tinte hnenah tel man Rs 2000 theuh hlan an ni bawk.

Swachhata Hi Seva 2024 thil tum ber chu faina chungchang inhrilhhriatna zau zawk neih mai bakah faina kawnga thawk chhuak a, nitin nunah faina, mipui mimal tinte hnena tuh a ni a. Poshan Maa chuan ei leh in (nutrition) tha zawk naupang leh nu ten an neih theih nan leh ei dan tur (diet) tha an hriat theih nan a inhrilhhriat (awareness) neih chu a tum ber a ni.