1962/2025-2026

Dated Kolasib the 2nd September 2025: Vawiin khan Kolasib Venglai Bazar kawtzawlah Mega Oil Palm Plantation Drive 2025 chu hman a ni a. He hun hi Pu Lalfamkima, Deputy Speaker, Mizoram Legislative Assembly chuan a hman pui a , loneitute hnena a thlawna sem tur Oil Palm tiak thahnem tak vailiamna hun a hmang nghal bawk.

He hunah hian Lalfamkima chuan Oil palm chu mizoram a thlai a commercial crop zingah ah a hlawk ber pawl ni a a hriat thu a sawi a. Phun atanga kum li chhung lek in a rah a chhuah nghal a, a lei tu tur an awm nghal bawk avangin innghahna tlak a ni, a ti.

Oil Palm chin thatna hrang hrang sawi chhunzawm in, thlai dangte angin a bo thu hla ah venthawn tur a awm ve lo a ni tiin, Oil palm chin chuan kan huan min tawmpui tu an awm ve lo a ni, a ti. Hemi piahlamah hian rah a chhuah hma , a chi lei atangin rah a chhuah a a enkawl zui thleng Sawrkar in kawng hrang hrang in tanpuina a siam a ni, a ti a, Oil Palm chin chu a ching mek ten a hlawk zia an hrechiang ber a ni, a ti bawk.

Deputy Speaker chuan tun sawrkar ah kuthnathawktuten beiseina sang tak annei a ni tiin, an hnathawh a thlawn lo ani tih an hmu chho tan tawh ani a ti a. Sawrkar chuan kuthnathawktute hamthatna tur in theihtawp a chhuah chhunzawm zel dawn a , chuvang chuan mi hlawhtling te taihmakna entawn a thawkrim turin kalkhawmte a chah a. Oil Palm mai bakah, Kolasib District bikah , a ram leilung ina a ngaih tur thlai chi te ngun taka ngaihtuah a pawimawh hle a ni, a ti bawk.

He hunah hian Pu Robert C Lalhmangaiha, DC Kolasib pawh in thu sawiin,oil palm chu chawp leh chilha a hlawkna tel theih thlai a ni, a ti a.

Oil palm chingtute tan Agriculture Department leh Godrej Agrovet te thawhdunna chu a fakawm takzet a ni a ti a. Amah ngei pawhin Oil Palm Processing na hmun pawh a tlawh thin thu sawiin, kan ram economy atan hun lola kal zel turah pawh ala pawimawh chho zel dawn a ni, a ti . District Administration atang pawh a tul ang ang, loneitute Oil palm chin chungchanga puih theihna an neih chuan puih zel an inhuam a ni, a ti bawk.

He hunah hian Technical Report, Pu Lalruatkima , Sr Executive GAVL atangin ngaihthlak niin, Oil palm chu India in thlai hriak ei chi ah intodelh tum na pakhat a nih thu tarlan a ni a.

Kolasib leh Mamit ah Godrej Agrovet hnuaiah oil Palm chinna zau zawng hi 1776 ha a ni a, loneitu 1030 in an ching a ni. Kolasib bikah ha 313 a rah hralh theihna a awm a, ha 485, a la sen avanga a rah hralh theih rihloh a awm bawk. Kolasiba Oil palm chin mek zau zawng hi 798 ha a ni a, a chingtu, Farmer 496 an awm a ni. Oil palm hi tun sawrkar kum kalmekah tun tun dinhmunah loneitute hian Rs 1.43 Cr man vel an hralhchhuak tawh a, Rs. 3Cr man hu vel hralhchhuah beisei a ni.

Sawrkar in Oil Palm chingtute tan hamthatna tamtak a siam a, chungte chu, a thlawna a chi tiak te loneitute hnena sem te. Oil palm rah hun, kum li hma a oil palm nena phun kawp tur thlai ngaihtuahpuite, leitha a enkawl man tur bituk chin tum pui te, tuipekna hmanrua, link road siam leh repair te leh thil pawimawh dang te ah a tul dan ang zelin sawrkar in a pui thin a ni. Heng bakah hian mamawh hrang hrang lakkhawmna tur One stop solution pawh Bukvanneiah din niin, hmun dangah pawh din belh zel tum a ni bawk.

Vawiina Oil Palm Mega Plantation Drive hi Pu Joseph Lalnuntluanga, District Agriculture Officer in kaihruaiin, Kolasib District chhunga Oil Palm chingtute leh oil palm chin chungchanga hriat belh duh mi thahnem tak an kalkhawm a ni.