543/2022-2023
Kolasib dated 19th May 2022: May 2022 atanga hman tan tur, Mahatma Gandhi National Rural Employment Guarantee Scheme hnuai a hna hrang hrang thawktute vilna tur National Mobile Monitoring System (NMMS) chungchang inzirtirna leh tih chhina hun vawiin khan I&PR Conference Hall, Kolasibah neih a ni a. Pu R.Lalnghakliana, Project Director, DRDA chuan Training hawnna hun hi hmanpuiin Thingdawl RD Block hnuai a Village Council 17 atangin Village Employment Council, Village Level Administrative Assistant leh Mates-te an tel a ni.

Pu R.Lalnghakliana, Project Director, DRDA chuan khawtlang hmasawnna hna thawk tur a khawtlang aiawh kalkhawm Village Employment Council member-te chu Sawrkarin hmasawnna hna kalpuina tur a ruahmanna a siam te belchiang peih turin leh kalphung thar awm te zir thiam tur a theihtawp an chhuah a tul thu a sawi a. Khawtlang hruaitu hmangchang hria leh inzirpeih mi kaihhruaina hnuai ah chuan khawtlang hmasawnna hna pawh kalpui a sawt phah thin thu sawiin Sawrkar laipui hnuai a duan, MGNREGS hna vilna tur NMMS pawh tangkai tak a hmangtu nih tum theuh turin kalkhawmte a chah bawk a ni.

Pu Gaston Vanlalhriatpuia, BDO, Thingdawl pawhin thu sawiin khawtlang hmasawnna sawt zawk a kalpui tur chuan khawtlang hruaitute inpekna leh taimaknaah a innghah thui hle thu a sawi a. Hmasawn duh tak takna thinlung puchunga rinawmna nen Sawrkar hnuai a hamthatna awmte chu awmze nei tak a kalpui zel turin kalkhawmte a chah.

Vawiin Thingdawl RD Block hnuai a Mahatma Gandhi National Rural Employment Guarantee Scheme VEC, VLAA leh Mates-te tan a National Mobile Monitoring System chungchang inzirtirna hun hi Pi Mina Lalhmingthangi, APO in a kaihruai a, Pu Lal Jeho Malsawmkima, CA in NMMS chungchang sawi zauna leh a taka hman dan tur entirna hun a hmang bawk a ni.

National Mobile Monitoring System hi Mobile phone atanga hman tur niin MGNREGS hna te langtlang lehzual a thawh a nih theih nana duan a ni a. MGNREGS hnuai a hnathawktute kal dan a hmun ngei ah chhinchhiah a nih dawn bakah a viltu VEC/VLAA/Mates-te tan heng hnathawktu hming chhinchhiahte chu MGNREGS Software-ah rang zawkin a inthawn theih tawh dawn a ni.