1306/2022-2023
Kolasib dated 20th July 2022: Vawiin chawhnu khan New Multipurpose Hall, Govt. Kolasib College-ah Pu John LT Sanga, Deputy Commissioner hoin 'Nasha Mukt Bharat Campaign' khuhhawnna hun hman a ni a. He Campaign kaltlang hian Kolasib District chhung ah ruihhlo lak a fihlim tur a zirlaite inzirtirna uar zawk a kalpui tum a ni.

Pu John LT Sanga, Deputy Commissioner chuan ‘Nasha Mukt Bharat Campaign’ thil tum te sawi zauna hun hmangin ruihhlo lak a la fihlim ten tih chhin ve chakna an neih loh nan ruihhlo that lohna uar zawk a zirna in hrang hrangahte inhrilhhriatna kalpui leh ruihhlo avanga harsatna tawk mekte uluk zawk a enkawl an nih theih nana hmalak a nih thu a sawi. Ruihhlo hman sual avanga taksa leh rilruin a tawrh phah nasat thin thu te, chhungkua leh khawtlang tan a harsatna a thlen phah thin thu te tarlangin Deputy Commissioner chuan ruihhlo do chu mi tin mawhphurhna a nih thu a sawi.

Pu Vincent Lalrokima, CJM chuan ruihhlo hman sualna chuan pawikhawihna lian zawk a thlen phah fo thin thu sawiin ruihhlo bawih a tangte chhanchhuah hna chu mahni phak tawk theuh a thawk thin turin a chah a. Mimal, chhungkua leh khawtlang nun tinuam tur chuan ruihhlo lak a kan fihlim tlan a pawimawh thu a sawi.

Vawiin ‘Nasha Mukt Bharat Campaign' khuhhawnna hi Pu David Zaitinvawra Hmar, DCPO in a kaihruai a, Pu Vanlalruata, Coordinator in hmalak tawhna leh hmachhawp tarlanna hun hmangin Sub-Headquarter YMA, Kolasib district leh Peer Volunteer atangtein thusawi ngaihthlak a ni bawk a ni.