1307/2022-2023 

Vawkhniahzawn thla ni 20, 2022: Lawngtlai District Food Safety Committee thu rel bawhzuiin, Food Safety Inspection Team te chuan vawiin khan Lawngtlai Chandmary huam chhunga thingpui dawr, restaurant leh sa zawrhna te an endik a. Dawr neitute hnenah mipui hrisel zawk nana thianghlim leh hrisel zawka ei leh in sawngbawl dan turte an zirtir nghal a ni. 

Food Safety Inspection Team hi Sub-Deputy Commissioner Pu Samuel Lalmalsawma Sailo chuan a ho va. Team member-ah hian State sawrkar leh Lai Autonomous District Council-a he lam kaihhnawih department ai awhte an tel a ni.

Vawiina endiknaah hian Lawngtlai Chandmary huam chhunga thingpui dawr, restaurant leh ei tur siamna leh zawrhna hmunte an fang kual a. Lawngtlai khawpui chhunga ei tur siamna leh zawrhna  hmun dangte pawh a tahtawlin Food Safety Inspection Team hian an fang zel dawn a ni.

Food Safety and Standards Act, 2006-in a phut angin ei leh in siamna emaw, sa zawrhna emaw chu thianghlim thei ang bera vawn tur a ni a, tho leh rannung dang te pawhin an bawm mai mai theihin dah tur a ni lo va. Thupek leh dan ding lai zawm lote chu mipui tana hri kai darh theitu an nih mai bakah, dan anga hrem theih an ni bawk.

Food Safety Adjucating Officer Pu James Miahlung chuan July ni 18, 2022 khan Lawngtlaia ei leh in siamtu leh zuar chhuaktute chu Food Safety and Standards Authority of India  (FSSAI) hnuaia inziak lut vek tura hriattirna a lo chhuah tawh a. Registration hi Chief Medical Officer office-ah tih tur niin, July 19 - 22 chhungin office canteen nghakte, July 25 - 29 chhungin bakery leh catering neitute leh August 1 - 5 chhungin restaurant, thingpui dawr leh hotel neitute tan registration tihna hun hawn a ni.

Attachment

  • Loading attachment...