1308/2022-2023 

Mamit 20th July, 2022 : Vawiin khan Mamit Sub-Hqrs YMA Committee Room-ah Pu Robert Romawia Royte, Minister, Sports & Youth Services, Tourism, Information & Communication Technology/ President, MCO Gen. Hqrs chuan Mizo Cultural Organisation (MCO) Sub- Hqrs. Mamit a hawng.

Minister chuan kan culture kawng hrang hranga runa a awm mek laia Mamit MCO Sub-Hqrs hawn theih a ni chu lawmawm a tih thu a sawi a. Kan hnam culture kan vawnnun a kan humhim zel theih nan MCO te chu an pawimawh dawn thu sawiin vawiina kalkhawm, pawl hrang hrangte chu tha tak leh inpawh tlang taka thawkho zel turin a chah. Minister chuan kan hnam humhalhna kawngah harh tharna thleng se a duh thu sawiin hnam ziarang a ral chuan a mihringa-te awm mahse Mizo hnam tan a pawi thei a, kan hnam chin dante theihtawpa chawinung zel turin kalkhawmte a chah a ni.

MCO chu kan ramchhung mai bakah State pawnah te pawh din zel tum anih thu sawiin Cultural Festival hrang hrang buatsaih thei tura hmala turin duhsakna a hlan bawk.

He hunah hian Pu Vanlalchhuanga Chhangte, President Sub-Hqrs YMA, Mamit, Pu Lalbiakhlua, Secretary, MCO Gen.Hqrs leh Tv. KTC Lalrinchhana, Adviser, MCO Mamit te'n thu an sawi bawk.

He hun hi Tv. Zobiaksanga, Vice President, MCO Mamit chuan kaihruaiin Pu Lalchhandama Pachuau, President, MCO, Mamit chuan lawmthu sawina a nei bawk a ni.

Vawiin vek hian Sports Minister hian Darlak khua tlawhin Darlak Field siam that anih theih nana hmalak dan tur a enfiah a. Darlak khawtlang hruaitute'n lo dawngsawngin an mamawh hrang hrangte Minister hnenah hian an lo thlen bakah infiammite hman turin khawtlang hruaitute hnenah hian infiamna bungrua chi hrang hrang a pe nghal bawk a ni.

Minister hian Bawngva Field, Mamit District Sports Complex siamna hmun tur hnathawh mekte a hmunah a enfiah nghal bawk.