602/2025-2026

Dated Kolasib the 28th May 2025: Nimin khan Kolasib DC conference Hall ah National Highway 306&06 thawmthat mek a hna chakzawk a a kal theih dan tur sawiho a ni a. He meeting hi Pu Robert C Lalhmangaiha, Kolasib DC chuan kaihruaiin, kar kalta inrinni, 24th May 2025 a Home Minister, Pu K Sapdanga hova Sairang leh Kawnpui inkar kawng an enfiahna thuchhuak bawhzuina a ni nghal a ni.

Meeting ah hian Chairman, Kolasib DC chuan meeting an kohna chhan te sawifiahin, inhmuhkhawm chu thil tul tak a ni, a ti a.

Kuminah fur a intan hma avangin NHIDCL in kawng thawmthat hna an thawh pawh nasa takin a nghawng a , chumi piahlamah an kawngpui siam tawhsa pawh hmun tamtakah a chhe leh tawh a , hengte avang hian kawngpui tha an neih theih nan theihtawp a an tan ho angai a ni, a ti.

DC chuan kar kalta lawkah Home Minister ngei pawhin kawng dinhmun chu a enfiah tawh thu sawiin, chuta an thutlukna te pawh chu a rang thei anga bawhzui chu an tihmakmawh a ni, a ti. Vawiina an thutkhawmna ah chuan NHIDCL atanga an kawng siam mek report an ngaihthlak tur thu leh chumi report atanga an ngaihdan theuh te an sawiho angai a ni, a ti a. Home Minister hova ruahmanna anga kawng siam ten chak zawka hna an thawh theihna tura kawng dan dan tur chungchang pawh sawiho a tur a nih thu a sawi.

He meeting ah hian NHIDCL aiawhten report pe in an kawng siam meka an hnathawh dan leh harsatna an tawhte an tarlanga. Sum sanction awm lo chu an harsatna ber a ni tiin, sum release hma in contractor thenkhatte phei chu mipuite mamawhna avangin, inbiakna neihpuia hna an tan tir te pawh an awm thu an sawi a. Tunlai khawchhia in kawng siam a tih hautak thu sawiin, ni hnih thum ruahsur lova a awm chuan an kawng siam chuan nasa takin hma a sawn dawn a ni, an ti. Heng bakah hian Khamrang leh Kawnpui inkar PWD enkawl mek pawh NHIDCL kuta hlan fel a ni tep tawh a, hlan a nih rualin hna an thawk tan nghal dawn a ni, an ti. Balaji Construction Company te pawhin report pe in thawmthat ngai lai te an thawmtha zel dawn a, amaherawhchu kan ram leilung nghet lo lutuk avang leh a innghahna (a base) tihngheh(strengthened) a nih loh chuan a tha rei thei tak tak dawnlo a, chumi tihngheh na tur chu an estimate ah a tello a ni, an ti.

Thutkhawmna ah hian Kolasib DC bakah Pu David H. Lalthangliana, Sr SP, Kolasib; CO, 1st IR Bn Mualvum; NHIDCL aiawhte, Sr EE, PWD, DFO KOLASIB,Addl DC, Project Director, SDO Sadar Kolasib, Bairabi Civil SDO  ,DIPRO ,DTO leh sawrkar official dangte leh Vairengte, Khamrang leh Kawnpui khawtlang hruaitute, Sub-Hqrs YMA President leh Secretary, MJA Kolasib District aiawhte leh Kolasib District Truck Owners and Drivers Association te an tel a. Pawl hrang hrang aiawh lokalte hian Kawng dinhmunah chuan an lungawiloh thu sawiin, hun rei tak atanga an lo khel tawh angai leh ngai ngawta a awm thin chu pawi an tih thu sawiin, kawng tha an neih theih nan sawrkar leh NHIDCL lam ten tun atanga theihtawp an chhuah ngei an duhthu an tarlang bawk.