603/2025-2026

Aizawl the 28th May, 2025 : National Health Mission, Health & Family Welfare Department hnuaia National Urban Health Mission (NUHM) buatsaihin Ni 2 awh tur Review meeting cum Orientation and re-orientation training of NUHM Module chu White Stone Conference Hall, Ramhlun North Aizawl-ah nimin atang khan neih tan a ni.

He meeting hi Dr. Lalawmpuia Chhangte, State Nodal Officer, NUHM in kaihruain Staff kalkhawmte lawmna thu a sawi a. National Urban Health Mission (NUHM) hi Mizoram ah kum 2014 atana ding tan a nih thu a sawi a. NUHM ah hian Urban Primary Health Centres 10 : ITI, Zemabawk, Sihphir, Chawlhhmun, Hlimen, Lawipu, Sazaikawn( Lunglei), Hrangchalkawn (Lunglei), Champhai leh Kolasib ah te a awm a, UPHC tinah hian Medical Officer, Pharmacist, Staff Nurse, Health Worker, Laboratory Technician, Account Clerk leh Helper te an awm thu sawiin thawktu 157 an awm mek thu a sawi. NUHM hian urban Area-ah miretheite hnen thlengphak a thlawna inentirna leh inenkawl hi a tum ber a nih thu a sawi bawk. Staff kalkhawm te chu mipuite tana an thiamna leh theihna zawng zawng hlan a, taima leh rinawm taka thawk zel turin a chah.

Urban Primary Health Centre (UPHC) zawng zawngah hian Doctor hnena damlo inentir hi a thlawn vek a ni a, damdawi leh test an tih theih ang ang te hi a theih chin chin-ah a thlawn a pek thin a ni. Nau neih leh natna ziaawm deuh te pawh UPHC damdawi in-ah hian a awm theih a. Specialist Doctor hi kar tin a thlawn a inentir theih tur a tirh thin niin Vaccine hi Inrinni tin (Inrinni vawihnihna tel loin) lak theih a ni bawk. Mipui ten Urban Primary Health Centre (UPHC) hi an chhawr tangkaiin an hlut thin hle a ni.

He Review Meeting-ah hian UPHC tina Medical Officer te leh MO Incharge ten Power Point Presentation pe in, an hnathawh dan report pe in an harsatna neih te an tarlan bakah hmasawn zawka kal dan tur chungchang te sawiho in an zirho bawk.