Vawiin chawhma khan DC Circuit House kawt zawl, Bangla Kawn, Kolasibah Office of The Divisional Horticulture Officer leh Kolasib Florist Association tangkawp buatsaih Ni thu awh tur ‘Flower Exhibition cum Fair’ hawnna hun neih a ni a, Pi Sangchhin Chinzah, Deputy Commissioner, Kolasib district chu khuallian a ni.

Pi Sangchhin Chinzah chuan Ram changkang apiangah thing phun leh pangpar khawi an uarin hmun ualau leh len khawthawnna hmunah te pangpar mawi tak tak an khawi nasat thu a sawi a, “Mizoram khaw hrang hrangah pangpar khawi mawi tak tak hmuh tur a pung chhoh mek a, hei hian changkanna lamah hma kan sawn ve mek a ni tih tilang tu a ni”, a ti. Khuallian chuan pangpar khawi lam a tui mite tan Flower Exhibition cum Fair chu inphochhuahna hun tha a nih ngei a beisei thu sawiin he Exhibition tihhlawhtlin nana DHO, Kolasib division leh Kolasib District Florist Association te hmalakna fakawm a tih thu a sawi bawk a ni.

Pi Vanlalchhuangi, President, Kolasib District Florist Association chuan he Flower Exhibition cum Fair-ah hian Kolasib Florist te chuan pangpar anmahni khawi leh enkawl ngei an phochhuah thu sawiin Kolasib khua tihmawi nan kawngdungah Saron pangpar khawi a hmalak mek a nih thu a sawi bawk.

Flower Exhibition hawnna hun hi Pu C Lalremsiama, Divisional Horticulture Officer, Kolasib Division in kaihruaiin Centre of Excellence for Horticulture, Thingdawlah Curcuma pangpar enchhinna neih a nih thu a tarlang a, he pangpar tihlar nan hmalak thuai a nih tur thu a sawi bawk a ni.

Flower Exhibition cum Fair hi ni 22 atanga 24, January 2020 thleng neih a ni ang a, pangpar chi hrang hrang entur leh lei theih a phochhuah a ni. Exhibition-ah hian category 7 ah inelna siam niin Queen of the show lawmman te buatsaih a ni dawn a, he inelnaa tel tur hian hming 92 ziahluh tawh a ni bawk a ni.