Vawiin khan Mizoram sawrkar Planning & Programme Implementation Department huaihawtin line department hrang hrangte tan Lawngtlai DC Conference Hall-ah hmasawnna ngelnghet nei tura hma lak hona tur (Sustainable Development Goal - SDG) chungchang zir hona (sensitisation workshop) buatsaih a ni.

He hun hi Lawngtlai Addl DC Pu K. Laltlawmlova'n a kaihruai a. P&PI Department-a Principal Adviser cum Additional Secretary Pu Saihlira'n kal khawmte lawmna thu sawiin, hun buatsaih chhan a sawi fiah a. Sawrkar chuan mipuite hnena sum pek mawl tawp a, an duh dan dana hmantir aiin, ruahmanna fel tak nena an mamawh rawn thlentute hnena an mamawh ang zela sum pek lam a kalpui tawh zawk tih sawiin, hmasawnna ngelnghet nei turin department hrang hrangte thawh ho that a, ruahmanna fel tak siam thiam a pawimawh thu a sawi.

He hunah hian SDG Consultant Pu C. Vanlalzawna leh Pu C. Lalnunmawia te'n powerpoint presentation hmangin SDG awmzia leh Mizoram dinhmun te, SDG-in a tum (goal) leh chu'ng a hlawhtlin dan tehna (indicator) hrang hrang te an sawi fiah a. Sawi hona hun hlawkthlak tak hman niin, Lawngtlai District Research Officer Pi H. Chhunkungi'n lawm thu a sawi hnuin hun khar a ni.

Sustainable Development Goal hi kum 2015-a United Nations General Assembly-in khawvel ram hrang hrangte'n hmasawnna ngelnghet an neih theih nana kum 2030 hma ngeia an tihhlawhtlin tur 17 a ruahman a ni a. Hei hi India ram paw'n tihhlawhtlin tumin, state leh district hrang hrangte pawh hemi tihlawhtling tur hian hma la turin a ti a ni.

SDG 17 zingah hian retheihna um bo, tam tihbo, hriselna tha, zirna tha, hmeichhia leh mipa intluk tlanna, tui thianghlim leh faina, ei leh bara hmasawnna leh kan chenna leilung leh chhehvel boruak humhalh te chu a langsar zual an ni.