No.2040/2021-2022

Aizawl dated 28th August 2021: Vawiin chawhma khan District Soil & Water Conservation Quarter thlang, Vengthar Kolasibah Tokyo Olympian Nl. Lalremsiami hmuahna hun hman a ni a. Dr.H.Lalthlangliana, Deputy Commissioner, Kolasib chuan he hun hi kaihruaiin Minister Pu K.Lalrinliana'n Mizoram Sawrkarin a Lalremsiami tan a inhmun a ruahman sak LSC a hlan nghal bawk a ni.

Supply Minister Pu K.Lalrinliana chuan rampum tihmingtha thin tu Nl.Lalremsiami, Kolasib mi kan nei chu lawmawm a tih thu sawiin malsawmna dawng tlaka a tum ruhna leh taimakna chu mizo thalaite tan a entawntlak a nih thu a sawi a. Harsatna hrang hrang kara a tuina kawnga beidawng loa a beihna avanga hlawhtlinna a hmu chu fakawm a tih thu a sawi bawk a ni. Infiamna kawnga rampum tihmingthatu Nl.Lalremsiami chawimawina atana Mizoram sawrkar ruahmanna a hlawhtlin theih nan Chief Minister Pu Zoramthanga leh Soil & Water Conservation Department Minister Pu R.Lalzirliana leh DC Office, Kolasib district-te hmalakna avanga inhmun tha tak Nl.Lalremsiami hnena hlan theih a buatsaih a ni chu lawmawm a tih thu a sawi bawk a ni. 

Supply Minister Pu K Lalrinliana chuan infiam mi hlawhtling tak takte sum lak luh țhin dan ngaihtuahin Sports chu Mizoram sawrkar chuan Industry pawimawh tak pakhatah a puan tawh thu a sawi a hemi kawnga tui mite chu hlawhtling tlak a bei turin a chah bawk a ni.

Tokyo Olympian Nl.Lalremsiami chuan Mizoram sawrkar leh Kolasib mipuite duhsakna leh thilpek hrang hrangah lawmthu sawina hun hmangin Mizo țhalaite chu infiamna kawng hrang hrangah tum ruhna leh taimakna nen hlawhtlinna chan tum a bei turin a chah a. 

Hlawhtlinna a chan te chu Sport & Youth Services Department kaltlanga sawrkar hmalakna leh Mizoram mipuite duhsakna vang a nih thu sawiin rampum hlawhtlinna anga a ngaih thu a sawi bawk a ni.


Nl. Lalremsiami hmuahna hunah hian Kolasib khaw chhunga infiam mi hrang hrang intel khawmten lawmpuina thil pek an hlan a, tlawmngai pawl leh khawtlang aiawha thilpek hlanna hun hman a nih bakah Kolasib khaw chhung fankualpui a ni bawk a ni.

Attachment

  • Loading attachment...