No.5009/2020-2021

Vawiin chawhma khan VC House, Project Veng, Kolasibah District Civil Supply Office ruahmannain National Food Security Day 2020 lawmna hun neih a ni a, ‘One Nation, One Ration Card Atan I Ration Card-Ah Adhaar Link Rawh’ tih thupui a hman a ni.

National Food Security Day lawmnaa Khuallian Pu Timothy R Lalhmangaiha, SDC chuan India danpuiin a India khua leh tuite tan a chanvo hrang hrang a siam ang bawk hian National Food Security Act 2013 hnuaiah hian chanvo kan nei ve theuh a, chung chanvote chu hamthatna dawngtu mipuite hian kan hraitchian a ngai a, chanvo pechhuak tura mawphurna kengkawhtute phei hi chuan kan tih tur leh tihloh turah kan chian a ngai hle a ni, a ti.

Hun kaihruaitu Pu CC Sakhawliana, ADCSO chuan India rama Ration sem tan a nih dan te tarlangin a semdan kalphung vawi engemaw zah siam danglam a nih hnuah Mizoramah March 2016 atangin National Food Security Act hi hman tan a nih thu a sawi a. Pu Joseph Lalnuntluanga, Inspector hnen atangin NFSA 2013 kalpui dan tlangpui ngaihthlak a ni bawk a ni.

Pu HC Lallianzuala, District Civil Supply Officer, Kolasib chuan lawmthu sawina hun hmangin Kolasib district chhunga Fair Price Shop tinah FCS&CA Department atanga pekchhuah Digital Weighing machine chauh hman tur a nih thu an sawi a, chutiang hmanglo te chu hrem theih an nih thu a sawi a. Tun dinhmunah hian Mizoram puma chhungkaw za zela 8.93 chauhin Ration card leh Adhaar card thlunzawm an awm thu tarlangin One Nation One Ration Card (National Portability) chu chak zawk a kalpui a nih theih nan Adhaar card nena thlunzawm ngaihpawimawh a tul thu a sawi bawk a ni.

Kolasib district ah hian FCS&CA hnuaiah Centre 8 a awm mek a, Retailer 75 awm bawkin Ration card holder 53,048 an awm a, an zinga 2,347 te chu AAY an ni.

National Food Security Act,(NFSA) 2013 hi India ram pumah 10th Sept,2013 khan hman tan a ni a, Mizoramah NFSA, 2013 hi 1st March,2016 atangin hman a ni thung. NFSA,2013 hnuaiah hian hamthatna dawng thei tur Antyodaya Anna Yojana (AAY) leh Priority Households (PHH) thlante hnenah buhfai man tlawmtein thlatin pek an ni.

Buhfai hi Kg-ah Rs.3.00 zel a pek an ni a, AAY chhungkuate hnenah thla khatah 35Kgs leh PHH beneficiaries mi Pakhatah 5Kgs zel a pek a ni.

AAY Family leh PHH beneficiary-te tan hian Ministry of consumer Affairs,Food & Public Distribution,Govt. of India atangin thlatin buhfai 5479.83 MT dawn thin a ni. Mizoram Sawrkarin PHH beneficiary mi pakhat tan 3Kgs leh Non-NFSA pakhatah 8Kg a pein Kg1 Rs.15/- in mipuiten Retailer atangin an la thin. Central Sawrkarin Census-2011 population tlawhchhan a Mizorama NFSA beneficiary thlan a phalsak zat chu 706296 a ni a. Hei hi mihring awmzat atanga 64.73% a ni. Beneficiary thlan phal zat bituk atang hian AAY chhungkua 26,100 thlanchhuah phalsak mek a ni bawk.

NFSA beneficiary ten an chanvo (Quota) an lak theih nan Fair Price Shop (Retailer Dawr) hi thlakhat chhung hawn tur a ni a. Vawi khatah an quota an la thei lo a nih pawhin Instalment-in an la thei bawk a ni.
One Nation One Ration Card( National Portability)

Tunlai hrileng Covid -19 avanga rampum buaina karah sawrkar laipui chuan mi harsa zawk ten (NFSA Beneficiary ten) awlsam zawka ei leh bar an hmuh theih nan India ram chhung khawi hmun pawh a awm Ration Card nei ten an ration an lak theih dan tur ruahmanna a siam a. Hei hi National Portability hnuaia ‘One Nation One Ration’ hi a ni.

i) Hemi tihlawhtling tur hian Mizoram Sawrkar pawhin hma a la mek a ni.

ii) Hemi hnuaiah hian AAY leh PHH te hi ngaihpawimawh hmasak an ni a, hlawhtling taka kalpui a nih theih nan Adhaar thlunzawm a ngaih avangin beneficiaries ten Aadhaar number neih vat leh thlunzawm vat hi an mawhphurhna a ni.

iii) India ramchhunga State/UT 20 velah hman a ni tawh a. Ration Card (AAY leh PHH) nei Ration Card leh Aadhaar Card thlunzawm tawh te chuan State dang Portability hmang ve te hnenah an ration quota hi an la thei tawh a. Mizoram chhunga Retailer (District tin a thlan bik) internet signal nei thate hnen atangin State dang a mite pawhin an la thei bawk a ni.

iv) Fair Price Shop internet signal nei tha bikte District tin atanga thlanchhuah turte hi DCSO ten an tifel tep a, mipuiah puan zar leh a ni ang.

v) Aadhaar Card leh ration card thlunzawm tawh ten ePOS machine online a hmanna Retailer-ah he hamthatna hi an hmang thei a, Inter State a quota lakna turah pawh online retailer kalpui ve tho te a nih a ngai.

vi) Mizoram chhung khawi hmunah pawh Ration an lak theihna turin Mizoram chhung bik chauh inthlunzawmna kalpui a nih dawn avangin Aadhaar leh Ration Card hi thlun zawm ngei ngei a ngai a. Covid 19 hrileng mek avangin mipui himna ngaihtuah chunga Aadhaar seeding leh Ration Card linking tura ruahmanna siam mek a ni.

vii) He hamthatna hmangtute hian tum khatah ration 50% an la thei a, hei hi thla chanve hmalamah niin hmundang atanga an quota hi lak then a nih loh chuan thla chanve hnulamah an quota la awmte an la zo thei ang.