No.5010/2020-2021

Dated Champhai the 12th September, 2020: Vawiin khan Champhaiah District Civil Supply Office buatsaihin National Food Security Day 2020 hman a ni a, Pu Mark Lalthanliana, Addl. DC Champhai chuan khuallian niin a hmanpui.

Khuallian Pu Mark Lalthanliana chuan thusawiin India ram chu Welfare State a nih angin sawrkarin a khua leh tuite a ngai pawimawh em em a ni, a ti a. Man tlawm zawka mirethei ten buhfai leh thildang an lei theihna turin kum 2013 September ni 12-ah Food Security Act pawm a nih thu sawiin, Covid-19 avanga State puma kan inkharkhip lai pawh khan he Act hnuai atang hian District Civil Supply Office, Champhai kaltlangin ei tur nei lote hnenah leh Champhai Home hrang hrangah buhfai sem chhuah thin anih  thu a sawi a. NFSA, 2013 hnuaiah hamthatna dawng thei tur AAY leh PHH thlante hnenah thlatin buhfai man tlawmtein pek thin a nih thu a sawi bawk.

NFSA 2013 Mizorama hman a nih ve theihna tur atan State sawrkarin Rules a siam 'The Mizoram Food Security Rules, 2015' Clause - 8 in a tarlan angin Veng/Khaw tinah Selection Committee, bialtu DCSO Chairman-na hnuaiah din vek anih thu a sawi a. Pu Mark Lalthanliana chuan Central sawrkarin tunlai hri leng avanga ram puma buaina kan tawh laiin mi harsa zawkte'n awlsam zawka ei leh bar an hmuh theihna turin One Nation One Ration Card kalpuiin India ram chhung khawi hmunah pawh Ration Card nei chuan ration an dawn theihna tur a ruahman thu a sawia, hetianga min enkawltu sawrkar chungah pawh mipuite hian lawmna chang kan hriat a ngai a ni, a ti bawk.

He hun kaihruaitu Pu Spencer Vanlalchhuanga, DCSO Champhai chuan Covid 19 avangin mipui tam tak pungkhawm zawngin hun hman theih ni lo mahse sawm bik mi tlemte te nen hun hman a nih thu a sawi a. Mizoram chhungah NFSA hnuaiah bebeficiary 6,89,439 (PHH-6,13,481 leh AAY 75,958) an awm thu sawiin, Computerization Scheme kalpui a nih hnuah Mizoramin buhfai a lakluh apiang, state Kudam a rawn thlen atanga Retailer dawr a thlen thlenga buhfai chetvel dan hi online hmang veka record fel a nih thu leh  hei hian kawng laka buhfai bothlau tur nasa taka a ven thu a sawi a. NFSA hnuaiah hian AAY leh PHH te tan Sawrkar laipuia Ministry of Consumer Affairs, Food & Public Distribution atangin thla tlin buhfai Metrict Tone 5479.33 dawn thin a nih thu a sawi bawk.

He hunah hian Seclection Committee aiawh leh Beneficiary-te'n thu an sawi bawk a ni.