No.5011/2020-2021
Lawngtlai, Mimkut thla ni 12, 2020: Vawiin khan a tum khat nan National Food Security Day chu District Civil Supply Office, Lawngtlai huaihawtin Lawngtlai DC Conference Hall-ah hman a ni.
He hun hi Sub-Divisional Officer (Sadar) Pu V. Lalruatliana, MCS chuan kaihruaiin, mi harsa zawkte'n an mamawh buhfai a man tlawma an lak theihna tur leh tam laka mi rethei ber pawh an him theihna tura sawrkarin National Food Security Act (NFSA), 2013 a duan chu thil lawmawm tak a nih thu leh mipuite'n an chanvo an hriat chian theih nana Food Security Day hman pawh chu thil tha tak nia a hriat thu a sawi a. Supply Department, retailer leh mipui (consumer) te chu inpawh tlang taka thawk ho va, thil dik lo do zel turin a chah.
Lawngtlai DCSO Pu B. Liansiama chuan Lawngtlai District Supply Department hna thawh dan leh district dinhmun tlangpui a tar lang a. Tun dinhmunah Lawngtlai District-ah Food Corporation of India (FCI) Godown pakhat leh Mizoram FCS&CA distribution centre (depot) pasarih (7) a awm a. Fair Price Shop (retailer) 107 awmin, ration card eng (AAY) 2289, card pawl (PHH) 8326 leh card var (Non-NFSA) 8637, a zavaiin ration card 19252 a awm mek a. Tunah hian ennawn mek niin, veng tinah a thlangtu (Selection Committee)-te'n NFSA beneficiary tur hi an thlang leh mek a ni.
He hunah hian District Consumer Union President Pu B. Lalhuma hnen atangin thu sawi ngaihthlak a ni a. District Project Manager Pu C. Lalrinawma'n powerpoint presentation hmangin Food Security leh Targeted Public Distribution System (TPDS) chungchang sawi fiahin, sawi hona hun hman a ni a. Inspector of Food & Civil Supplies Pu R. Lalmuankima'n lawm thu sawiin, hun khar a ni.
DCSO Lawngtlai hnuaiah hian COVID-19 hri leng karah mipuite'n harsatna an tawh loh nan theih tawpa hma lak niin, sawrkarin a thlawna buhfai leh ei tur dang sem tur a ruahman pawh tluang taka kalpui a ni a. Lawngtlai District-ah PMGKAY hnuaiah April atanga September thla thlengin a thlawnin buhfai quintal 20281.40 sem tawh niin, Atma Nirbhar Bharat (ANB) hnuaiah khualzin tangkhang leh ration card nei lote tan May & June 2020 khan thla khat atan mi pakhat zelah buhfai kg 5 sem a ni bawk.
NFSA hnuaiah hian buhfai hi kg-ah Rs 3/- zela pek niin, thla tin AAY chhungkuain kg 35 leh PHH member pakhatin kg 5 an dawng a. Mizoram sawrkarin kg 1 Rs 15/-in PHH member pakhat tan kg 3 leh Non-NFSA member pakhat tan kg 8 zel a pe bawk a. NFSA hnuaiah hian ration card leh Aadhaar card thlun zawm kalpui mek niin, 'One Nation, One Ration Card' kal tlangin NFSA beneficiary-te'n ram chhung khawi state atang pawha ration quota an lak theih nan hma lak mek a ni bawk.
Attachment
- Loading attachment...
