No.838/2021-2022

Kolasib dated 7th June 2021: Vawiin chawhma khan Kolasib Parkkawn Primary Health Centre-ah nausen Pneumonia leh natna hrang hrang laka invenna Pneumococcal Conjugated Vaccine (PCV) pek tan a ni. Kolasiba PCV pekna pual inkhawm neihah hian Kolasib DC Dr. H. Lalthlangliana chu khuallian niin, mahni chhia leh tha hriatna la hmang thiam lo, nausente’n hriselna tha an neih theihna kawngah nu leh pa ten mawhphurhna sang tak an neih thu a sawi a, “Doctor-te leh mithiamte rawn chung zela a hun tak a naupang Vaccine laktir thin hi nu leh pa te mawhphurhna lian tak a ni” a ti.

PCV hi Mizoram puma hman tan tur leh Routine Immunisation – natna hrang hrang laka invenna a thlawna sem mekte belhchhahna tur a ni a. Pneumoccus Bacteria hrang hrang - Pneumonia, Meningitis, Septicemia-te leh natna ten nau Sinusitis, Otitis media-te laka invenna a ni . Heng natna te hian a bik takin naupang kum 1 hnuai lamah natna a thlenin thihna hial pawh a thlen thei a ni. 

PCV hi khawvel ram hrang hrangah pawh an lo hmang tawh a, India ramah pawh State thlan bik 5 (panga) ah kum 2017 atang khan pek tawh niin, kumin atang hian India ram pumah pek tura hmalak a ni a. PCV hi naupang kar 6, kar 14 leh thla 9 atanga thla 12 ah te pek tur a ni dawn a, naupang Vaccine an lak thin dan pangai (Routine Immunization) a vawi khatna (1st Dose), vawi thumna (3rd Dose) leh Measles Rubella (MR) Vaccine an lak rualin pek tur a ni dawn a ni.

Vawiina Kolasib a PCV Vaccination kalpuinaah hian CMO hnuaia Health Worker-te chuan nausen PVC dawng theite hnenah vaccine hi an pe nghal a ni. Dr. Lalhlimpuia, CMO, Kolasib District chuan PCV Vaccine chu mimala la tur chuan sum tam tak chawi a ngaih thin thu a sawi a,  a thlawna Vaccine tha tak lak theih a ni ta chu lawmawm a tih thu a sawi bawk a ni.


Attachment

  • Loading attachment...