567/2024-2025

Kolasib dated 27th May 2024: Vawiin khan DC Conference Hall, Kolasibah hur sualna lak a naupang venhim kawng a thawktu Office leh tlawmngai pawl hrang hrang hruaitute chuan ‘Protection of Child from Sexual Offences Act 2012’ chungchangah thutkhawmna an nei a. Pu John LT Sanga, Deputy Commissioner chuan hun kaihruaiin Pi Cacy Malsawmtluangi Ralte, Chief Judicail Magistrate chuan POCSO Act 2012 chungchangah zirtirna a pe a ni.

Hun kaihruaitu Pu John LT Sanga, Deputy Commissioner chuan khawtlang nuam siam tur chuan naupangte zalen leh himna hmun ngaihtuah tel a pawimawh thu sawiin chumi tur chuan naupang venhimna dan kan neih hrang hrangte kan hriatchian a ngaih thu a sawi a. Hur sualna avang a naupang nun kawng thui tak a chhe zawng a nghawng thei thil duhawm loh thleng tur ven nan leh hetiang tih hmang te man chhuah leh hrem an nih ngei theih nan POCSO Act 2012 zirtirna neih chu a pawimawh hle thu a sawi.

Vawiin thutkhawmna ah hian kum 2016 atang a 2024 thleng hian POCSO hnuai a thubuai ziah luh 126 a awm tawh thu leh chung zing a pawikhawitu tam zawk chu kum 18 hnuai lam bawk an nih thu tarlan a ni a. Naupangin ngaihven an hlawh lohna chungkua, eizawnna avang a inchhungkhur a puitlingin fate an uap tam lohna chhungkua, ruih theih thil avanga chhungkaw buai leh nu leh pate vilpui loh a naupangin phone an khawi tamna chhungkua ah POCSO thubuai hi a tam deuh nia a lan thu tarlan a ni. Kum tling lo zing ah bawk POCSO buaina hi a tam avangin Zirna in leh Kohhran kaltlang a inzirtirna kalpui a pawimawh thu sawi niin hemi kawng ah hian mithiam ten naupang kum bithliah dan azirin zirtirna pek ni se tih rel a ni. Pawi khawihna lian zawk a thlen loh nan kum tling lote chung a zahmawh rawng kai a, zaizir leh tawngka a inchhaih nawmnahna a awm a nih chuan naupangin an chhungte emaw thuneitute hrilhhre vat tur a zirtirna pek thin a pawimawh thu sawi a ni a. Court thleng lova inngaihdamna chu sual tihzalenna hmanrua a nih thu sawi a ni bawk.

Pi Cacy Malsawmtluangi Ralte, CJM tarlan danin ‘Protection of Child from Sexual Offences Act 2012’ hian kum 18 hnuai lam mipa leh hmeichhia a huam a, Sexual Assualt avangin a tlem ber ah kum 3, Penetrative Sexual Assualt avangin a tlem ber ah kum 10 leh Aggravated Sexual Assualt avangin a tlem ber ah kum 5 leh Aggravated Penetrative Sexual Assualt avangin a tlem ber ah kum 20 tang turin, thil tisualtu chu hrem theih an nih thu a tarlang a. Zahmawh rawngkai a inchhaih nawmnahna, Sexual Harassment hnuai a thil tisualtu chu kum 3 thleng tang tur a hrem theih a ni bawk. POCSO hnuai a a tuartu hmel leh nihna pho lan chu dan hmang a hrem theih a nih thu CJM chuan tar langin naupang chungah thil tha lo a thleng a ni tih hre si a, thuneitute hnen a thlen lotu pawh hrem theih an nih thu a sawi bawk a ni.