4247/2024-2025

Dated Kolasib the 14th February, 2024: Tukin zing khan  Diakkawn Traffic point bul, Kolasibah Road Safety month hawnna puala hun hman a ni a. He hun hi District Road Safety Committee in a huaihawt niin, Pu Benjamin Lalhmingsanga, District Transport Officer chuan hun a kaihruai a, Kolasib SP, Pu David H Lalthangliana chu khuallian a ni.

Road Safety week hmanna ahhian khuallian chuan thu sawiin, Road Safety Month hawnna hun hman hma pawh in tun thla tir atang khan Traffic Police leh MVI te chuan lirthei endik hna chu uluk lehzualin an lo kalpui tawh a ni, a ti. Road safety Month pawimawhna sawiin, kan him tlan zawk nana inzirtirna leh fimkhurna kawnga hmalakna uar zawka a kal theih nana a thla bila siam a ni, a ti.

SP chuan dan hrang hrang te chu kan him tlan zawkna atana siam niin, keimahni tan a ni, a ti a. Fimkhur tura uar leh zuala inhrilhhriat nana he thla hi hmang tangkai turin kalkhawmte chu a chah a. Traffic dan bawhchhia hremna pawh a san tawh viau thu sawiin, a khalhtu tur nilovin motor a khalh te, rui chunga motor khalh te, naupang kum tlinglo motor khalh te, phone hmang chunga motor khalhte leh document felfai lova motor khalh te chungah thuneituten dan hmangin hremna an lekkawh dawn a ni, a ti. Road Safety month  ti hlawhtling tur chuan mitinten anmahni zawn theuh ah sawrkar in kan him zawk nana dan a siam te kan zawm a pawimawh takzet a ni, a ti.

SP hian a thusawina ahhian report tawi pe nghal in, 2023 chhung khan Kolasib District ah Fatal accident (nunna chan) mi 15 an awm a, 2024 ah mi 8 awmin 2025 ah vawiin thlengin mi 1 an awm a ni, a ti.

Vawiin hun hmanna ahhian Kolasib SP bakah Pu Robert C Lalhmangaiha, Kolasib DC te, Kolasib a Head of Offices te, Kolasib Police leh Traffic official te, Kolasib a Drivers leh Vehicle Owners aiawhte leh khawtlang mipuite an tel a ni. He hunah hian Road Safety week puala thutiam sawi rualna hun hman a ni bawk.