2225/2022-2023
Kolasib Dated 7th October 2022: Vawiin khan I&PR Conference Hall, Kolasibah Right to Information Week 2022 hawnna leh District Level Training For SPIO & SAPIO hawnna hun neih a ni a. Pu H.Dolianbuaia, Secretary, Mizoram Information Commission chu khuallian niin Pu John LT Sanga, Deputy Commissioner chuan hun a kaihruai bawk a ni.

Pu H.Dolianbuaia, Secretary, MIC chuan Right to Information Act chu sawrkar langtlang leh tha siam nana hmanraw tangkai tak a nih thu leh a nihna tur ang tak a hman thiam inzirtirna kalpui a pawimawh thu a sawi a. Sawrkar hnathawk, RTI zawhna dawngte chuan hunbi tiam chhunga chhanna pek ngai pawimawh turin leh a zawttute pawhin zawhna pawimawh leh awmze nei zawh nachang hriat a pawimawh thu a sawi. RTI Act hnuai a zawhna chhan hna chu hna pangai ang bawk a ngaih pawimawh tur a nih thu Pu H.Dolianbuaia chuan sawiin phurrit leh hna belhchhanna anga ngai lo a, danin a phut ang ngei a hunbi tuk chhung ngei a chhang thin turin SPIO leh SAPIO-te a chah bawk a ni. District Office tin ah hna kalpui dan tarlanna leh mawhphurhna changtu tarlanna, ‘Citizen Charter’ leh RTI Act kalpui nana State Public Information Officer leh State Assistant Information Officer-te hming tarchhuah ngei tur a nih thu te, RTI Online Application kalpui tan a nih thu leh Office hrang hrang website enkawl that a pawimawh thu khuallian hian a sawi bawk a ni.

RTI Week 2022 hawnna hunah hian Capt. KH David Lalnunsanga’n hunserh hmangin Pi C.Lallianpuii, DFDO leh Pi Lalruatpuii Hnamte, SDC-te chuan RTI Act chungchanga hriattur pawimawh hrang hrangte Powerpoint Presentation hmangin zirtir an pe a. Pu Hmingthanzuala, DIPRO chuan lawmthu sawina hun a hmang bawk a ni.

Kolasib district chhunga Office hrang hranga SPIO leh SAPIO-a ruatte, khawtlang hruaitute, tlawmngai pawl hruaitute leh MJA member-te vawiin RTI Week hawnna ah hian telin District Level training hi neih chhunzawm nghal a ni.