2226/2022-2023

Champhai, the 7th October, 2022: Ram pum huap Nungchate humhalhna Hapta vawi 68-na (68th National Wildlife Week) Champhai District-a hman mek kharna hun chu vawiin chawhnu khan Bungzung Community Hall-ah Champhai Forest Division bultumin buatsaih a ni.

He hunah hian thu sawiin Champhai DFO Pu Lalduhthlana chuan ramngaw leh nungchate humhalh kawnga Bungzung khawtlangin hma an lo lak nasat tawh ṭhinnaah lawmthu hrilhin, vawi duai lo Group leh State level-a Bungzung YMA in Environment humhalh kawnga lawmman an lak ṭhin chu fakawm a tih thu tarlangin thawhho pui atan he huna kalkhawmte chu a sawm a. Ramngaw leh nungcha humhalhna dan leh hraite sawifiahin dan bawhchhetu hrem theihna dante a sawifiah bakah dan bawhchhetu ni lo hram turin kalkhawmte a ngen a ni.

Thu sawitu dang Champhai District Honorary  Wildlife Warden Pu Lalhlupuia chuan ram leh khawtlang dan zawm lova palzut thinten hremna leh vanduaina an tawk ṭhin nia a hriat thu sawiin, Mizoramah Sa pel, Sava veh leh Luia cheng nungcha tihlum thin, tihhlum tum leh ram vak ṭhin ṭhahnem takin vanduaina tawkin an boral phah tawh nghe nghe a ni, a ti a. Nungchate leh an chenna ramngawte humhalhtu ni ṭheuh turin kalkhawmte chu a sawm a ni.

He hunah hian District Level Narco Coordination Centre (NCORD) Champhai District ruahmanna angin Pu C.Hmingthantluanga, ASI, Champhai Police chuan ruihhlo hman sual pawi zia leh a ṭhat loh ziate powerpoint presentation hmangin a  sawiifiah a. Zirlaite chu kan hnam hmelma, nun titawia, piansualna thlentu ruihhlo laka inthiarfihlim turin a sawm a. Ruihhlo thalo tawlhtute zeppui lo tur te, a hlauhawm zia hriaa ti chhintu ni lo tur leh ruihhlo chu ti ve chhin lo hrim hrim turin mipui a sawm a ni.

Pu Lallawmawma, Bungzung Branch YMA President pawhin he hunah hian thu sawiin EE& CC Department-in an khuaa nungcha humhalhna kawnga inzirtirna an buatsaih avangin lawmthu a sawi a. Bungzung khawtlangin ramngaw leh nungcha humhalh kawnga hma an lo lak nasat ṭhin ziate a tarlang bawk.

He hapta kharna inkhawm Bungzung VCP Pu Goldena kaihhruaiah hian Bungzung khuaa Middle School, High School leh Centenary School zirlaite, Bungzung Educational Staff Association member-te leh tlawmngai pawl hruaitute an tel thei a ni.

Hun hman hi Khawbung Forest Range Officer, Pu Laltlanhlua'n lawmthu sawiin a khar a.  Vantlang inkhawm neih hnuah hian Bungzung khuaa ramvak ṭhinte chu DFO leh a thawhpuite chuan kawmin inpawhtlang takin nungcha humhalhna kawnga hmalak dan turte an sawipui a ni.