No.3978/2021-2022

Aizawl Dated 11th February 2022 : Directorate of Labour, Employment, Skill Development & Entrepreneurship (LESDE), Govt. of Mizoram buatsaihin ‘Sensitization Programme for Skill Upgradation in Mizoram Under SANKALP’ chu Kolasib DC Conference Hall-ah neih a ni. Dr. H. Lalthlangliana, DC, Kolasib chuan hun kaihruaiin LESDE-a thawktute, Kolasib District-a Sawrkar Department hotute leh NGO-te’n eizawnna tlak thiam thil tihpunna kawnga hmalak dan tur chungchangah inkawmna hun an hmang nghal bawk a ni.


Labour, Employment, Skill Development & Entrepreneurship Department (LESDE) Director Pu K. Lalhmingliana chuan ram changkanna leh hausakna chu a chhunga cheng mipuite thiam thil neih dan leh an thiamna an hman danah thui tak a innghah thu a sawi a. Pathianin ram leilung a hausakna a dahte leh mihring hnena theihna a pekte hi haichhuak a tih pun hi mihringte mawhphurhna a nih thu a sawi bawk. Pu K. Lalhmingliana chuan Mizoram Sawrkarin Skill Development Scheme hrang hrang mipuite tan a chhawpchhuahte chu ngai pawimawh a, nasa zawka hetiang lama ke pen turin kalkhawmte a sawm a. Thiamna ngelnghet leh hmantlak tak nei turin Sawrkar hriatpuina hnuaia Skills Development Training Centre hrang hrangah mahni tui zawng leh thiamna tihpun nachang hriat a pawimawh zia a sawi bawk a ni. 


Kolasib DC Dr. H. Lalthlangliana chuan chhawr tlak ni turin hman tlak thiamna neih a pawimawh thu a sawi a. Midang behchhan ngai lova mahni thiamna ngei hmanga intungnung thei turin mizo thalaiten țan an lak a țul thu a sawi. 


He hunah hian Pi Zohlupuii, Asst. Mission Director – SANKALP chuan Skill Acquisition and Knowledge Awareness for Livelihood Promotion (SANKALP) sawi zauna hun hmangin țhalaite’n an thiamna leh theihna hmang thei tura inrintawkna pek chu SANKALP thil tum ber a nih thu a sawi. Pi Jordan Thangi, Employment Officer – LESDE in Craftment Training Scheme chungchang leh zirna an kalpui dan sawina hun a hmang a. Pu Lalchhuanmawia, MIS Manager, PMKVY in Pradhan Mantri Kaushal Vikas Yojana (PMKVY) hnuai a Mizoram chhunga hmalaknate a tarlang bawk a ni.


Attachment

  • Loading attachment...