907/2026-2027

Kolasib, 9th June, 2026: Vawiin chawhnu khan Sr. Chief Medical Officer (CMO) Office Chamber, Kolasib-ah Ministry of Health & Family Welfare hnuaia ruahmanna, India ram pum huapa naupangte zinga kawthalo (diarrhoea) vanga thihna pumpelhna tura beihpui thlakna 'STOP Diarrhoea Campaign 2026' kalpui dan tur chungchangah Kolasib District Steering Committee te an thukhawm.

He hun hi Dr. R.K. Lalthlamuana, Sr. CMO Kolasib chuan a kaihruai a , thu sawiin, "Kawthalo ven nan faina leh Zinc a pawimawh" tih thupui hmanga beihpui thlak a nih thu a tarlang a. Kolasib District chhungah naupang kawthalo vei leh he natna vanga thi an awm lohna turin department hrang hrangte thawhhona a pawimawh hle a ni, a ti. Hriselna chu faina leh thianghlimna te, tui thianghlim in tur hnianghnar neih te leh ei tur tha nen a inzawm tlat avangin, mipuite leh line department hrang hrangte tangrual chauhvin he hmalakna hi hlawhtling takin a kalpui theih a ni, a ti bawk.

STOP Diarrhoea Campaign hi kumin June ni 16 atanga July ni 31, 2026 chhung hian kalpui tur a ni a. He hun chhung hian Health & Family Welfare, Women & Child Development, Education, PHE leh Rural Development department te tanghovin Kolasib District chhunga Anganwadi Centre, sikul leh damdawi in hrang hrangah te 'ORS & Zinc Corner' siam a ni ang. Naupangte leh anmahni enkawltute hnenah kawthalo ven dan leh enkawl dan te, tui thianghlim in pawimawhna, kut sil fai dan leh faina chungchang inzirtirna uar taka kalpui a ni dawn a ni. Hei bakah hian Block Level leh Primary Health Centre (PHC) a thawk te tan Orientation Training neih tura ruahmanna siam a ni bawk.

Kumin STOP Diarrhoea Campaign hawnna (District Launch) hi June ni 16, 2026 khian District Hospital, Kolasib-ah neih tura ruahman a ni a. Report-a a lan danin, he beihpui thlak chhung hian Kolasib District-a khaw 70 chhunga naupang kum 5 hnuai lam mi 7,521 te chu bitum (target) niin, an hnenah hian ORS packet 2 zel leh Zinc tablet mum 14 zel sem tura ruahman a ni.