4295/2023-2024

Kolasib dated 21st March 2024: Vawiin chawhnu khan SIRD & PR, Kolasib leh District Legal Services Authority tangkawp buatsaihin SIRD Conference Hall, Kolasibah a tum khatna atan ‘World Down Syndrome Day’ pualin hun hman a ni a. Pi Cacy Malsawmtluangi Ralte, CJM chuan hun kaihruaiin Pu ZR Thafala, Principal, SIRD&PR chu Resource Person a ni a, Pu Hmingthanzuala, DIPRO chuan a telpui bawk a ni.

Resource Person Pu ZR Thafala, Principal, SIRD & PR, Kolasib chuan enkawlna hranpa leh mamawh bik nei, Down Syndrome neite leh an chhungkuate pual a hun buatsaih a ni chu lawmawm a tih thu sawiin ‘World Down Syndrome Day’ pual a hun hmanna hian Down Syndrome avang a harsatna thuhmun tawk mek chhungkua te inkarah inpawhna leh a tul hun a intanpui tawnna kawngah hmasawnna a thlen ngei a beisei thu a sawi a. Harsatna lian tak a lang pawh a huho a hmachhawn a nih chuan hun hlimawm leh hriatreng tlak ah a siam theih thu sawiin Down Syndrome vang a harsatna nei chhungkua te chu tanrual a pawimawh thu a sawi. Pu ZR Thafala chuan Down Syndrome nei nau piang an awmin nu leh pa ten dawnsawn an thiam theih nan Damdawi inah hemi kawng a thiamna nei, Counsellor an awm a pawimawh thu a sawi a, mamawh bik nei a piang an nih angin an chenpui chhungkua te inpekna a pawimawh hle thu a sawi bawk a ni.

Hun kaihruaitu Pi Cacy Malsawmtluangi Ralte, CJM chuan ‘World Down Syndrome Day’ chu ni 21, March 2012 atang hman tan a nih dan leh Kolasib district-ah chuan a vawi khatna a nih thu a tarlang a. India khua leh tui kan nih angin, chhan hrang hrang avangin kan danglam deuh a nih pawhin India Constitution chuan kan himna tur leh kan hmasawnna turin dikna chanvo min pek theuh thu a sawi a. Pu C.Vanlalnunhlima, Special Educator, The Playstop, Play School & Daycare, Diakkawn chuan Down Syndrome naupang enkawl kawng a hriattur pawimawh te tarlangin anmahni danglamna theuh hriatpui leh dawhtheihna thui tak neih a tul thu a sawi bawk a ni.

Vawiin Kolasiba ‘World Down Syndrome Day’ pual a hun hmanna ah hian Kolasib khaw chhung a Down Syndrome-te leh an chhungte an tel a, inhmelhriattirna hun te neih niin harsatna an tawh thin te leh an hmachhawn dan inhrilhtawnna hun te neih a ni.