No.7687/2020-2021

Vawiin  hi World Hearing Day a ni a, hemi ni pual hian Kolasibah pawh ri hriatna enkhawl dan kawnga inzirtirna hun Kolasib District Hospital OPD Complex-ah neih a ni. He inkhawmnaah hian thupui ‘Hearing Care for All’, tih hman niin Dr. Doris Lalnunmawii Sailo, Dist. Medical Superintendent, Kolasib chuan inkhawm a kaihruai. 

Thupui ‘Hearing for All’ chu Dr. Vanlalbuatsaiha, Medical Officer, National Programme for Prevention & Control of Deafness (NPPCD), Dist. Hospital Kolasib chuan mipui kalkhawmte hnenah sawi zauna a nei a. Beng ri hriatna pawimawhna leh a enkawl dan tur sawina hun hmangin, “Beng lam a harsatna ngaihthah rei hian bengngawngna a thlen thei a ni” a ti.

    Dr. Zochampuia Ralte, Dist. Nodal Officer, NPPCD chuan, Doctor leh mithiamte rawn lova damdawi kan ei thin hian kan hriatna thazam a tichhe theiin, beng ri hriatna a nghawng theih thu a sawi a. Ri hriatna lam a harsatna chuan zirna kawngahte pawh harsatna nasa tak a thlen theih thu sawiin mithiamte rawn nachang hriat a pawimawh thu a sawi a. Kum lam a upa, a bikin kum 60 chunglam te chu Pure Tone Audiometry hmangin kum khat ah vawi 1 tal inentir turin a chah bawk a ni.

    Tun dinhmunah Kolasib District Hospital-ah hian National Programme for Prevention & Control of Deafness (NPPCD) ah hian ri hriatna lam a harsatna neite tan a rawn turin thawktu pali an awm mek a ni.

    Kolasiba World Hearing Day pual a hun hmannaah hian a duh apiang tan District Hospital-ah Pure Tone Audiometry hmangin, ri hriatna chungchangah a thlawnin inentirna hun hman a ni bawk