350/2024-2025 

Kolasib dated 24th April 2024: Vawiin chawhma khan I&PR Conference Hall, Kolasibah Pu John LT Sanga, Deputy Commissioner chuan World Tuberculosis Day 2024 pual a hun hmanna chu Khuallian niin a hmanpui a. Dr. RK Lalthlamuana, Sr. Chief Medical Officer chuan hun kaihruaiin Kolasib District chhung a TB Free Village-a puan Village Council 14 hnen ah lawmpuina thilpek hlan an ni.

Khuallian Pu John LT Sanga, Deputy Commissioner chuan kan taksa chu hrisel tur a enkawl kawngah mawhphurhna pawimawh tak kan neih theuh thu sawiin taksa tan a thil tha lo ei leh in lo tur a insumtheihna nun neih a tul thu a sawi a. Hriselna chu khawtlang tihhmasawn nana thil pawimawh tak a nih angin boruak, tui leh eitur thianghlim nei tur a ruahmanna siam te, bawlhhlawh sawngbawl dan tha inzirtirte chu hmasawnna kailawn pawimawh tak a nih thu a sawi. World TB Day 2024 hmang tur a Village Council hruaitu kalkhawmte chu an khawtlangin anmahni ah hmasawnna kawng a kaihruaitu ni tur a rinna thui tak an neih avang a mipui thlan tlin an ni tih hre reng turin a chah a, TB natna umbona kawng ah leh khawtlang hrisel siamna kawng ah hmasawnna thlentu ni tur a chahin, Kolasib district chu TB Free district-a puan a nih thuai theih nan inpuahchahna tha tak leh thawhhona tha tak nen hmasawn zel turin duhsakna a hlan bawk a ni.

He hun a thusawitu Pu ST Lalhmingmawia, DLAO chuan khawtlangin faina leh thianghlimna kawng a hma a sawn theih nan sawrkai laipui pawhin khawtlang hruaitute tan zirtirna a buatsaih mek ah 'Healthy Village' tih thupui zeh tel a nih thu a tarlang a. Khawtlang hrisel siam tur a inthiarna felfai, tui leh ei tur thianghlim leh a chhung a khawsa mipuite hriselna ngaih pawimawh a nih thu sawiin TB Free village dinhmun a inhlaikaina pawh chu National Panchayat Award dawng tur a tehfung pawimawh tak a nih ngei a rin thu a sawi. DLAO chuan Mizoram chu kil hrang hrang atangin inkalpawhna changtlung zawk hmangin insumdawntawnna hmun pawimawh tak a la nih thuai tur thu a sawi a, chumi hun ah chuan hnam ang a chimral kan nih loh nan leh chung hmasawnna ruangam lo thleng tur hmang tangkaitu kan nih theih nan khawtlang inkaihhruaina kawng ah tun atanga inhmakhua lawk a pawimawh thu a tarlang bawk a ni.

Kolasib a World TB Day 2024 pual a hun hmanna ah hian Pu R.Lalrammuana, Supervisor, DOT Plus TB HIV chuan TB natna, a lan chhuah dan leh enkawlna kalpui dan tarlanna hun a hmang a. Village Council-te TB Free Village a puan theih tur a tehfung hrang hrangte tarlan niin TB natna avanga enkawk mek ten eitur tha an dawn theih nan a duh apiang tan Nikshay Mitra kaltlangin, tanpuina thla 6 chhung, thla tin 700 an pek theih thu sawi a ni a. Deputy Commissioner, Kolasib pawh hian vawiin hian TB natna veite tanpui nan Nikshay Mitra ni turin Sr. CMO hnen ah tanpuina a hlan nghal bawk a ni.

Kolasib district a Village council 56 zingah vawiin hian Thingdawl RD block hnuai a Village Council paruk, Zanlawn, Serkhan, N.Chaltlang-I, N.Chaltlang- II, Bukpui leh Thingthelh VC te chu TB Free Village ah puan an ni a. Bilkhawthlir RD block hnuai a Village Council pariat, Buhchangphai, Saihapui K, Pangbalkawn, Meidum, Phaisen, Saihapui V, N.Chawnpui leh Saipum VC te chu TB Free Village ah puan an ni. Kolasib district chhung a Village Council dangte pawh TB Free Village-a puan an nih thuai theih nan hmalak mek a ni bawk.