349/2024-2025 

2024 Ṭau thla ni 24: Vawiin hi Lawngtlai District-a hmeichhe inzawm khawm pawl lian ber, Lai Women Association (LWA) din champha phak vawi 28-na a ni a. LWA Bazar Branch, Lawngtlai te'n Bazar YLA Hall-a LWA Day lawmna hun an buatsaih chu Lawngtlai Additional Deputy Commissioner Pi B. Malsawmtluangi chuan Khuallian niin a hmanpui.

Pi B. Malsawmtluangi chuan LWA Member kal khawmte chu LWA Day chibai bukin, duhsakna a hlan a. Chhungkua, khawtlang leh ram siam ṭhatna kawnga hmeichhiate pawimawhna hrang hrang sawiin, fate enkawl leh kaihhruai kawngah ruihhlo laka fihlim leh zirna kawnga hlawhtling chher chhuak zel tura ṭan la thar turin a chah a. LWA member-te chu nu an nih anga chhungkua enkawl ṭha a, buaipui tur dik tak buaipui tur te, social media hmang nasa lutuk lo tur te leh, thawh rimna zawng zawngah hlawkna a awm angin an buaipui nasat lam apiangah a rah an seng dawn tih hre reng tur te'n a chah a. Khawtlang nun leh in chhungkhura hmeichhiate zahawmna leh hmasawnna tur chu hmeichhiate kut vekah a innghat tih sawiin, hmeichhiate chu mahni theihna zawn ṭheuhvah hmeichhe zahawmna vawng himtu leh hmeichhe dinhmun chawi sangtu nih tum turin a chah bawk.

He hun hi LWA Bazar Branch President Pi B. Lalrongengi'n a kaihruai a. Pro Pastor Victor Lalrinsanga'n hunserh hmangin, Branch Secretary Pi K. Lalthankimi'n report a pe a. Pi Lalramliani hnen aṭangin fuihna thu (motivational speech) ngaihthlak a ni a. CYLA, YLA Bazar Branch, Bazar VC leh LWA General Headquarters ai awhte'n thu an sawi bawk a. Zai, lam leh item hrang hrang hmangin intihhlimna leh intihsiakna buatsaihin, hun hlimawm tak an hmang a. Tlai lamah Day lawmna ruai an kil ho nghal a ni.

April ni 24, LWA Day hi Lai Autonomous District Council chuan sawrkar chawlhah puangin, LADC hnuaia office leh zirna inah te chawlh atana hman mek a ni a. LWA Branch hrang hrang chuan vawiin LWA Day hi khawtlang tana thil ṭha tihna ni atan te, member-te infuih thar leh intihhlimna ni atan te an hmang hlawm a ni.

Tun dinhmunah hian Lai Women Association (LWA) General Headquarters Lawngtlai hnuaiah Sub-Headquarters pali leh Branch 78 awmin, member sing khat vel an awm mek a ni.

Attachment

  • Loading attachment...