348/2024-2025 

LUNGLEI; the 24^th April, 2024: Vawiin chawhma dar 11:00 khan Convention Centre Conference Hall-ah Traffic and Transport Co-ordination Committee (TTCC), Lunglei Municipal Council chuan Lunglei khawpui chhunga Traffic management tha zawka kalpui dan tur relin, meeting an nei a. Pu K. Lalrinawma, Vice chairman LMC leh Chairman TTCC ni bawk chuan meeting hi a kaihruai a ni.

Vawiin meeting-ah hian  Lunglei khawpui chhunga  HMV & above luh hun enthat chungchanga agenda chu khunkhan taka sawiho a ni hnuah, tuna hmanlai Lunglei Khawpui chhunga  ding lova tlan tlang tur te tana 11:00Am-3:00Pm inkar hawn  chu 11:00Am-2:00Pm a pawh tawi ni se, Lunglei khawpui a riak tur te tana 6:30Pm-8:00Am  inkara hawn chu 7:30Pm-8:00Am  pawh tawi ni bawk se, ti a rel a ni.

Commercial Vehicles (Pick- up / Two wheeler) stand tur chungchang pawh rel niin, tunah hian Lunglei khawpui chhungah Two Wheeler taxi te tan Stand 10  Traffic lamin an identified tawh a, Stand 1-ah Two wheeler Taxi 5 zel ding tura ruahmanna an siam  chu meeting hian  pawmpuiin,  veng hrang hrangah Stand dang tur pawh siam belh zel tum a ni. Pik-Up stand chungchangah erawh Traffic lamin lo zir chiang leh zual se, meeting neih leh hunah zirchianna report tlawhchhan chuan thu thlukna siam ni se, ti a rel a ni.

Road marking / road sign boards siam chungchang pawh rel niin, LMC in an remchan ve leh Fund an tum anga, Traffic lamin a hna thawh tul ang ang te an bawhzui thung ang.

Lunglei khawpui chhunga Traffic titawttu hrang hrang te zirchiana, a tihtawp/siamrem dan leh LMC area chhunga one way a siam theih a awm em? tih te zirchiang turin Study Team din tura rel a ni. Hemi bakah hian TTCC chuan District/LMC Road Protection Squad chawinun/ din thar leh tha a ti bawk.

Rui chunga Two wheelers khalh thin te chunga chak zawka hmalak dan tur pawh rel  niin, LMC in Garage nei lo te tan August, 2024 aia tlai lova Garage nei vek tura thuchhuah a lo siam tawh chu a tul anga bawhzui zel dan tur rel a ni bawk.