3244/2023-2024

Dated Aizawl, the 5th January, 2023: Nizan (4.1.24) khan Delhi Mizoram House ah Delhi Mizo Welfare te leh Delhi Mizo Zirlai Pawl te chuan Chief Minister Pu Lalduhoma chu lawmpuina an hlan. He hunah hian Delhi a sawrkar hnathawk officer awm te leh company lama thawkte nen Mizoram tana hmasawnna tur rahbi awm nia an hriatte an sawi hova. Mizoram sawrkar tana hma an lo lak ve theihna lam chi thil hrang hrang te Chief Minister hnenah hian an thlen a ni. Zanriah an kil ho nghal bawk.

Zanin hian Kolkata Mizo Welfare te chuan Kolkata Mizoram House ah Chief Minister lawmpuina hun leh a puala zanriah an buatsaih ve leh a. Inkawmna neiin an mamawh thil te an lo thlen a ni.

He hunah hian Chief Minister chuan, sawrkar tharin hma a lak chhoh dan tur tlangpui leh a hmalak tawh thenkhat te a tarlang a. Investment lamah Mizoram chu Pathianin kawng duhawm tak a buatsaih sak dawn nia a hriat avanga a lawm thu te a sawi a ni. Hmun hrang hranga Mizoram House te hi Mizo mipuite tan tangkai taka hman a nih zel tur thu pawh sawiin, Delhi Mizo Wefare dintu zinga mi a lo nih ve avanga ram pawna Mizo awm te an hah thinzia a hriatthiampui thute a sawi a ni.

Kolkata Mizote hruaitute hian damlo awmna an indaih loh thin thu sawiin, Ballygunge a Mizoram sawrkar hmunhma, hralh tura ruahman mek sawrkar tharin hralh loh tura a ti leh ta chu lawmawm an tih thu an lo hrilh a. Damlo tan leh Mizo te inhmuh khawmna tur ni telin in sak ni se an duh thu an lo thlen a. Damlote MR Bill-a harsatna an tawh chungchang te an lo thlen bawk.

Chief Minister hian Delhi leh Kolkata a Mizo awm zawng zawng te chungah hian lawmthu a sawi a, ram tana mahni zawna theihtawp chhuaha thawh ho puiah a sawm a ni.