Chief Minister Pu Lal Thanhawla hmalakna in Mizo senior artist te kutchhuak painting tihlar nan leh West Bengal sorkar nena inthian thatna lantir nan July 9-12 chhung khian Kolkota Gaganendra Pradarsasala hall-ah Mizo Painting Exposition neih a ni dawn a. Inbuatsaihna kalpui dan tur sawi hovin vawiin khan I&PR Director, Pu L.R.Sailo hovin a office ah senior artist te an thukhawm a. He Exposition ah hian Mizo senior artist te kutchhuak bakah artist tha tak tak, hming langsar lemlo te kutchhuak pawh pholan a ni dawn a. Expostion hawnna leh kharna ah hian Kolkota khawpuia art lam mithiam leh mi langsar hote sawm an ni dawn bawk.

Kolkota khawpui hi hmasang atanga art leh literature hmunpui niin hemi lamah hian India ramah an sang hle a. Tun tum hi Kolkota khawpuia Mizo Painting Exposition neih vawi khatna tur a niin senior artist te an phur hle a. Hetianga Mizo kutchhuak pholanna remchang siamsaktu Chief Minister chungah an lawm hle a ni.