Chief Minister Pu Lal Thanhawla chuan Inrinni chawhnu khan Mizoram Bhojpuri Kalyan Samiti Cultural Programme vawi 3–na Vanapa Halla neihah Khuallian niin a hmanpui a, a nupui Pi Lal Riliani’n a tawiawm. Pu P.C.Zoramsangliana, Minister for Art & Culture etc. chu Khualzahawm a ni.

 

 

Chief Minister chuan he programme hmanpui tura an sawm chu lawmawm a tih thu sawiin, phur taka rawn tel anih thu a sawi a. India ram zau takah hian hnam hrang hrang, tawng hrang, sakhaw hrang leh nundan phung inpersan tak tak  chengkhawm nimahila, kan inlungrualna avangte, kan inzahtawnna avangte, kan thawhona a that avangtein kan tangrual a, kan inpumkhat a ni a ti a. Kan tanrualna a that avang hian pawn lam atang leh ram chhung ngei atanga min tihchhiat tumtute reng reng an hlawhtling ngailo a ni a ti. Chuvangin kan inpumkhatna hi ti phuisui zawngin hma ila zel ang u tiin kalkhawmte chu a sawm a. Hemi tihlawhtling tur chuan central sorkarah hotu tha leh chak kan mamawh a; tunah pawh hian hotu tha tak kan neih avang hian khawvel sumdawnna tlahniamin kan ram hi min nghawng na lo a ni a ti.

Mizorama Mizo nilo tlemte in hetiang pawl, intanpui tawnna duhtu an din chu lawmawm a tih thu Pu Hawla chuan a sawi a. Boruak muanawm leh remna hawia ke an penna reng rengah, a theih ve tawkah puih a inhuam reng dawn a ni, Chief Minister chuan a ti a. He hunah an zinga a tel thei chu a lawm tak zet a ni tiin, Mizote nen boruak tha tak hnuaiah thlamuang taka awm tura chahin, duhsakna a hlan a ni.

Khualzahawm Pu P.C.Zoramsangliana pawhin thu sawiin, India hi ram chak leh zahawm alo hih deuh deuh theih nan kan hnamziarang theuh kan inzahtawn a pawimawh a ni a ti a. He cultural programme hian hnam inpumkhatna a tih phuisui ngei a beisei thu sawiin, Culture Minister anih ang pawhin hetiang programme buatsaih hi zawngchhang chi nia a hriat thu a sawi bawk a ni.

Samiti President P.Pandey chuan an pawl hi kum 2002 a din anih thu sawiin, tanpui ngaite tanpui chu a thil tum anih thu a tarlang a. Nikum 2008 khan Bihara tuilian tuarte Rs.1 lakh in an tanpui thu a sawi a; kumin April thla khan TNT Zuangtui pawh tanpuina an pek thu a tarlang bawk a ni.

Khuallian leh Khualzahawmte hi shawl mawi tak an hlan a. He pawl member fate zirlai ti tha te hnenah  lawmpuina thilpek Khuallian leh Khualzahawmte hian an hlan nghal bawk a ni.

Programme ah hian India hnam hrang hrangte lam leh zai thahnem tak entir a ni.

 

 

 

{mosimage}