India rama District hnufual chawikan ngai  zinga Mamit District thlan a nih avanga hmalakna kal zelah vawiin khan Kawrthah khua-a huan neitu mi 100 te hnenah thingfanghma tiak semna leh training neih a ni.

He hun kaihruaitu Pu T. Vanlaltlana, Divisional Horticulture Officer, Tuidam chuan Mamit District chu India rama District hnufual chawikan tur zinga telh kan nih angin Horticulture  Department hnuaiah pawh Mamit District chhunga khaw thlan chhuah 10-ah te thlaitiak semna leh a phun enkawl zui kawnga hriattur  hrang hrangte inzirtirna neih a nih thu  sawiin vawiin hi a tawp kharna hun a nih tawh thu a sawi.

Kalkhawm mipuite chu District hnufual chawikan ngai kan nihna chu hmang tangkaia, hemi kaltlanga hmasawnna tur kawng hrang hrang kan hmuhte chu tangkai taka hmang turin a chah a ni.

He hunah hian Pu Lalduhzuala Colney, M.Sc (Agri), Horticulture Extension Officer chuan thei ei tamin mihring taksa-a hriselna a thlen theih dan (Nutritional value of Fruits and its Impact on Human Diet) chungchangah leh hlo tur hman sualin mihring leh thlaiah nghawng tha lo a neih theihdan zirtirna  a lem nen pein Pi F. Lalrinpuii M.Sc (Horti), Horticulture Extension Officer pawhin Thingfanghma phun leh a enkawl zuidan (Production Technology of Papaya) chungchangah zirtirna a lem nen pe bawk a ni.

Thingfanghma tiak hi cubic 45 cm biala phun tur niin a inkar hlat zawng chu 1.5 metre dan ah a nih thu tarlan a ni. 

Thingfanghma tiak semna leh a phundan in zirtirna hun hi Kawrthah Recreation Hall-ah  neih a ni a, kalkhawmte tangin zawhna leh chhanna hun hman  niin,  sawihona tha tak neih ni a. Huan neitute tana hamthatna a theih ang ang an dawn theihna tura Farmers cards siam theihdan in hrilhriat a ni a, Ration card, Huan pass, Voters ID, Passport Size pakhat kengin DHO, office Tuidamah siamtir theih a ni ang. Kawrthah North VC leh Kawrthah South VC te  hnenah Thingfanghma tiak tha chi Hybrid Red Lady 50 ve ve  sem a ni. He hun hi khawtlang hruaitute'n an telpui a ni.

Tuidam Horticulture Division hnuaiah hian huan thlai siamte tana harsatna leh  hriatbelh duh neite tan he mi  No.9774101386 ah hian Office hun chhungin zawh theih reng a ni.

Attachment

  • Loading attachment...