Vawiin khan UD&PA Minister Pu Zodintluanga chuan  New Economic Development Policy (NEDP) sum hmanga sak tur Zodin Multi Level Car Parking cum Utility Centre lung a phum a. MLA pahnih Pu T.Sangkunga leh Pu Chalrosanga Ralte te pawh he hunah hian an tel a ni.

Pu Zodintluanga chuan Mizorama la awm ngailo, Aizawl hmun lai li berah khawl hmanga car park-na robotic car parking hmasa ber Zodin Multi Level Car Parking cum Utility Centre  sakna tur lung phum a ni ta chu lawmawm a ti a. Lirthei nasa taka a pun avangin Aizawl khawpuiin harsatna a tawk mek a, a sutkianna tur kawng hrang hranga dapin UD&PA chuan kawng pengthuam hmun engemawzat a zauh tawh a, lirthei dahna tur hmun sak chhoh zel tum niin tunah Zodin Cinema Hall awmna thin a lirthei dahna tur changkang tak sak a ni leh tur hi Mizoram tana mel lung pawimawh tak a ni, a ti.  Zodin Multi Level Car Parking cum Utility Centre sak dan tur ruangam (design) duang turin Mizorama architect tha rual zingah inelna siam a ni a, chuta ti tha ber chu thlan chhuah niin a thawktu tur pawh open tender hmanga zawn leh tihfel a nih thu UD&PA Minister chuan a sawi a. NEDP hnuaiah kawng tinrenga hmasawnna hna thawh chhoh mek niin Maxi Cab park-na tur pawh hmalak mek a nih thu a sawi bawk. UD&PA Department hmalakna pawimawh tak dang sawiin Pu Zodintluanga chuan khawsak  harsa leh retheiten eizawnna tha an neih theih nan training pek an ni a, self-help group siam a ni a, chhungkaw engemawzat chen theihna tur in sak zawh tawh niin Pradhan Mantri Awas Yojana scheme hnuaiah in hmun nei, sakna tur nei si lo te tana sak hna thawh a nih thu a sawi bawk. 

MLA Pu T.Sangkunga pawhin thu sawiin khawpui chhunga mipui leh lirthei pungchak lutuk avanga harsatna sutkian nan sawrkarin kawng hrang hranga hma a la chu lawmawm a ti a. UD&PA Minister leh thawktute remhriatna fakin lirthei dahna tur building tha tak sakna tur lung phum a ni chu Mizoram mipui tana thil chhinchhiah tlak tak nia a hriat thu a sawi a ni.

Zodin Multi Level Car Parking cum Utility Centre hi NEDP hnuaia project niin a sak nan cheng nuai 2500 dah a ni a. A design tu tur atan open competition siam a nih hnuah JMT Architect thlanchhuah niin Precision Automation & Robotic India Ltd. (PARI) te nen thawk hovin fully automated car parking system with utility centre, Mizorama hmasa ber chu an siam dawn a ni. He Centre hian floor kua (9) a nei dawn a. Robotic lift system, firefighting system, automated fire alarm, mi 13 chuan theihna lift te a awm dawn a. Car khalhtu in a chhunga tlankuala park na zawn chawp ngai lovin parking bay-ah a khalhtu in motor a hnutchhiah anga, a dahna tur awl remchangah khawlin a dahlut tawh mai dawn a ni. Lirtheih dahna bakah he centre ah hian food court, exhibition neih theihna tur hmun, mi 200 thut theihna tur multipurpose hall leh office te a awm tel bawk ang. 

Vawiin programme hi UD&PA Secretary Dr.C.Vanlalramsanga’n a kaihruai a, UD&PA officer leh staff-te bakah Transport Department hotute leh Dawrpui Local Council member-te pawh an tel. UD&PA Director Pu Joseph H.Lalramsanga’n lawmthu sawiin programme hi a khar a ni.