Vawiin chawhnu khan Agriculture Minister Pu H. Liansailova chuan a Office Chamber-ah Agriculture Department-a officer-te hnena Mizoram-in Buh leh bal thar lama hmasawnna lawmman, Krishi Karman Award, kum 2011-2012 atana a dawn hrilhfiahna neih pahin Award lawmna thinpui inhona an nei. He hi Award Sawrkar laipuia Ministry of Agriculture hnuaia Department of Agriculture & Cooperation-in a buatsaih niin, tun thla ni 15 khan Mizoram aiawhin Agriculture Minister Pu H. Liansailova’n Krishi Karman Award hi President Pu Pranab Mukherjee kut atangin a dawng a ni.
Agriculture Minister chuan Mizoram chu buh leh bal, abikin buhah kan la intodelh lo em em nachungin leh buhfai kan mamawh atanga chhuta za zela 25 chuang awrh chauh kan la thar chungin tun hnai atang khan tlem tlemin kan buh thar te a lo pung ve hret hret a, leilehna atana khawl chakna kan hman te a lo pung deuh deuh a, leitha (fertilizer) kan hman te a lo pung a, thlai chi thar hlawk chi kan chin uar deuh deuh avang te, buh chinna atana leilet a lo zau deuh deuh avang te leh tlangram loneih lo tlahniam hret hret avang te, RKVY hnuaia Oil Palm chinna lo pung zel te avangin Mizoram Agriculture hian zawi zawiin hma a sawn zel a ni, a ti a. He kan hmasawnna hrang hrangte hi Sorkar laipui pawhin min hriatpuiin lawmman min lo hlan ta mai hi Mizoram kuthnathawktute leh loneitu thawhrimna leh taimakna leh Department-a thawktu Field Officer-te leh Staff te inpekna avang a ni a ti a. Hetianga hma kan sawn zel chuan he Krishi Karman Award hnuaia lawmman tha zawk te pawh kan la dawn theih mai a beisei thu a sawi bawk.
Mizoram hian buh leh bal thar that leh thar pun lamah kum 2009-2010 a dinhmun aiin kum 2010-2011 a a dinhmun kawng chi hrang hranga a san zawk avangin State tithate zinga Category-III-na hnuaiah India ram State dang 9 te nen Commendation Award a dawng a ni. He Commendation Award hian chawimawina (citation) leh pawisa fai Rs.25.00 lakh a keng tel a ni.
Krishi Karman Awards kum 2010-2011 atanga asiamniinIndiaram State hrang hrangte buh leh bal thar chhuah tam lama chawimawi tlakte chawimawina a ni. Category-I lawmman chu State, buh leh bal 10 Million Tonnes aia thar tam tan, Category-II chu State, buh leh bal 10 Million Tonnes thar pha lo, mahse 1 Million Tonnes aia thar tam si te tan, Category-III chu State, buh leh bal 1 Million Tonnes thar pha lote tan a ni.
Heng Award hrang hrang dawng tur thlang tur hian Selection Committee, Secretary (Agriculture & Cooperation) kaihhruaina hnuaiah din a ni a. Chu Selection Committee chuan State hrang hrangte buh leh bal thar tam tura hma an lakna chi hrang hrang, tehkhawng an siam hmangin an teh a, chuta phu nia an hriatte hnenah heng Award-te hi India President hnen atangin an dawng ta a ni. Mizoram hian Punjab, Uttarakhand, Assam, West Bengal, Tripura, Rajasthan, Gujarat, Arunachal Pradesh leh Himachal Pradesh ten nen Commendation Award hi a dawng tlang a ni. Mizoramin Commendation Award (Category-III hnuaia) a dawn ve theihna tura Selection Committee-in a tehna te chu :
1Kum 2009-2010 a Total Food Grains Production chu 0.62 lakh tonnes a nih laia 2010-2011 khan 0.67lakh tonnes a ni avangin (a pun hi 0.05 tonnes a ni).
2 Kum 2009-2010 buh thar 0.62 lakh tonnes chu 2010-2011 buh thar 0.67 lakh tonnes leh productivity 1246 Kg/Ha-a a san avangin.
3 Leilehna hmanrua (Farm Power) 0.25 atanga 0.60 kw/hr.-a a lo pun tak avangin.
4 Leitha (Fertilizer) hman 42.07 atanga 60.00 Kg/Ha-a a pun avangin.
5 Buh leh thlai chi dang thar hlawk chikanhman uar deuh deuh avangin (Seed Replacement Rate a sandeuh deuh avangin).
6 11th Five Year Plan tira Jhum Area 44,947 Ha atanga kum 2011-2012 ah 25,826 Ha-a a tlakhniamavangin.
7 RKVY Scheme-a Oil Palm Area Expansion Programme hnuaiah kum 2010-2011 chhunga ram 1970 Ha-azauva Oil Palm chin belh a nih avangin.
