Kan hmalawka Kristiante hunpui Krismas 2015 leh kumthar 2016 lo thleng tura mipui vantlang ten him leh thlamuang taka kan hman theihna tur atana venhimna kalpui dan tur Sawrkar mi pawimawh te leh tlawmngai pawl hruaituten vawiin khan D.C Conference Hall, Mamit-ah Pi Lalbiaksangi District Bawrhsap hovin sawi ho a ni.

Meetingah hian venhimna kalpuina tura inbuatsaihna hrang hrang thlir ho a ni a, Mamit District Police te, Excise Department leh YMA Branch hrang hrang ten hunpui chhunga venhimna an kalpui dan tur ruahmanna hrang hrang siam nghal niin Mamit khawpui chhunga him leh ralmuang taka hunpui hman a nih theihnan Police duty hmun 11 ah siam a ni dawn a, hei bakah hian khawpuichhungah Ni 23.12.15-3.1.16 chhung Police patroling nei thin tura ruahmanna siam a ni bawk.

Lirthei chetsualna laka mipuite kan him theih nan Excise Department lam leh Trafic Police tangrualin lirthei engchi pawh khalhtu ten zu an ruih leh ruih loh ni 15/Dec atang hian endik hna kalpui a ni bawk dawn a, YMA Branch paruk ten an mahni huam chhung theuhah duty post siamin hunpui chhung hian an duty dawn bawk a ni.

Ni 31 December zanah Mamit charkawnah thalaite tana intihhlimna hun buatsaih a ni dawn a, hemi lo buaipuia lo huaihawt tur hian sub Hqrs YMA leh MZI Mamit te chu ruat an ni.