Thian duhtakte u,

Chibai ule

1. Mizoram mipuite zingah kei leh ka nupuiin Krismas kan hmang thei hi kan lawm hle a ni. He rama kan rawn chuan chhuah hnua Krismas kan hman tum hnihna a ni dawn a, Krismas leh Kumthar lawmawm tak lo thleng turah hian Mizoram mipuite duhsakna chibai kan buk che u a ni.

2. Krismas hi hlimna hunpui a ni a. Inngaihtlawmna thinlung nena midangte tana luanchhuahna leh inpekna ni a ni. Keini misualte nena remna siam turin Pathianin a Fapa mal neihchhun khawvela a rawn tir hi hmangaihna avanga inpekna sang ber a ni a. “Lei chunga a lawm em em mihringte hnenah rem thu leng rawh se” tih thupui hrerengin kan chunga thil tisualtute ngaihdam leh kan mihringpuite nena lungrual taka chenho i zir ang u. Pathianin kan tana thil thlawnpek hlu tak Isua Krista min pe ang hian keini aia rethei zawkte tanpui ila, chutichuan he Krismas in a tum bulpui ber hi kan phawk chhuak thei dawn a ni.

3. Mizoramah hian kum khat leh a chanve ka lo cheng ve ta a, tlawmngai pawl leh vantlang mipute nen inkawmhona hun remchang te ka nei fo va. Hlimna leh lungawina thinlung pu tlat mi in ni hian min ti lawm a. Hnam tha leh hnuaihnung inthliarna awm lova kan khawsa hi a chhinchhiahtlak a, inpumkhatna thinlung nghet tak kan put hi i vawng nung reng ang u.

4. He hunah hian thil pawimawh thenkhat sawi nawn leh ka duh a. Kan nitin nun vawng uluk lehzual turin Mizoram mipuite ka ngen che u a ni. Cancer natna vei, ruihhlo ngai leh HIV vei tihtlem kawnga kan hmalaknain hma a sawn chak thei lo hi pawi ka ti hle a. Thil harsa tak anga lang hi awlsam taka chinfel mai theih a ni tih i hria ang u. Hriselna kawnga harsatna kan tawh tam tak hi ngaihtuahna fim tak hmanga nundan phung thlak danglam hian a vai kiang thei a. Chu chu mimal tin te duhthlannaah a innghat a ni.

5. Inthlak danglam kan mamawh lehna lai ka ngaih pawimawh em em chu khawvel hmundang kan thlirna tukverh hi hei aia zaua kan hawn a tul a ni. Kan khawtlang nun inpumkhatna a chhuanawm viau rualin hnam dangte nena kan inkara daidanna bang siamtu a ni thei a. Khaw khata cheng ang maia khawvel hmun hrang hranga mite an khawsakho tawh lai hian inkharkhip tlata kan khawsak reng a rem tawh lo. Kan theihna hai chhuak turin ramchhung hmundangte leh khawvel tan kan State leh kan rilru hi kan hawn ve a ngai a ni.

6. Ka kum upatpuite hnenah ngenna ka siam duh bawk a. Entawn tur hnutchhiah hi kan mawhphurhna, nundan tha zawk kawhhmuha kan khawvel tukverh hawng zau tura thangtharte zirtir hi kan tihtur a ni. Kan thalai ten remchanna zau zawk an hmuh mek lai hian kum upate pawimawhna hi a kiam chuang lova. Kan khawtlang nun siam tha tur hian kan vaiin kan pawimawh theuh a ni.

7. Inthiarna mumal nei lo awm lohna Open Defecation Free (ODF) State ni tura kan hmalakna hian min tilawm hle a. Champhai District, Aizawl khawpui leh Lunglei khawpui te chu ODF ah an inpuang ta a, hei hi midangte pawhin kan entawn tur a ni. Pathian an teuhna ber chu thianghlimna a ni an tih angin thianghlimna hi kan nihphung a ni. Chutiang bawk chuan, Mizoram hi lirnghing hlauhawm zualna Seismic Zone V a awm kan nih hriain chhiatrupna lo thleng thei laka invenna kawngah phur takin hma i la chhunzawm zel ang u.

8. Remna zawnga kan inbiak mek lai hian Krismas hi remna ni a ni tih ka sawi nawn leh a. Mizoram mipuite chu remna hlutzia inzirtir kan ngai tawh lo. Kan State a cheng zawng zawngte hi remna leh muanna vawng nung zel turin tih takzetin ka ngen che u a ni. Kum thar lo thleng tur hi phur tak leh tha tho takin, thil tha lo thleng tur beiseiin i hmuak ang u.

9. Krismas leh Kumthar chibai ka buk nawn leh a che u.

KA LAWM E.