Kolasib District chhunga Krismas leh kumthar vuakveta boruak muanawm leh thianghlim a awm theih dan tur relin vawiin khan District Bawrhsap Pu H.Lalengmawia, IAS hovin DC Conference Hall-ah district official te leh khawtlang hruaitute an thukhawm.

Pu C.Lalzahngoa, Superintendent of Police, Kolasib chuan nikum krismas leh kumthar vuakvet lamah uluk leh taima taka sumdawng motor khalhtute check an nih avangin lirthei chetsualna liantham pumpelh a nih thu sawiin, kumin hunpuiah pawh hian Sumdawng motor abikin mihring phur motor khalhtu te uluk zawka check leh tum a nih thu kalkhawmte a hrilh a.

Krismas leh kumthar vuakvet ah Puakthei thil leh naupang silai lem khapna thupek chhuah leh ni se tiin he meeting-ah hian rel a ni a. Khapna thupek bawhzui a, a hlawhtlin ngei theih nan dawrkai te uluk zawk a check ni se tih a ni a. Dan leh thupek kenkawh a, boruak muanawm loh a thlen loh nan magistrate leh police duty mai bakah khawtlang hruaitute nen tangrualin khauh zawka duty ni se ti a rel a ni bawk a.

Meeting-ah hian ruihlo tun aia uar zawk leh tha zawk thawhhona tha taka nena do dan tur te sawiho a ni bawk.