3634/2024-2025

Dated Aizawl: the 20 December 2024 : Vawiin khan Mizoram Cooperative Apex Bank chuan kum danga an lo tih thin angin Krismas pualin miharsa leh tanpuingaite tan luanchhuahna hun an hmang.

Vawiina luanchhuahna hunah hian Mizoram Cooperative Apex Bank chuan, Chairman Pu Lalnunsanga leh CEO Pu A. Lallungmuana hovin Director leh General Manager te nen Tawngtai Bethel Camping Centre, Sakawrtuichhun-ah leh Thutak Nunpuitu Team, Muanna Vengahte, Bufai Bag 20, Dal Bag 20, Tel Tin 7 leh pawisa fai Rs. 50,000/- ve ve an hlan a. Apex Bank chuan Mizo mipui ten ‘Mizo Bank’ tia duhsak taka an dawr thin avanga luangchhuak thei an nih thu sawiin Mizo mipuite ‘Krismas leh Kum Thar duhsakna chibai’ an buk nghal a ni.

Tun dinhmunah TBCC-ah hian enkawl lai leh thawktu zawng zawng chu mi 1232 an ni a. TNT-ah hian enkawl lai leh thawktu zawng zawng mi 1800 vel an awm bawk a ni.

Vawiin vek hian District dangah pawh Apex Bank Branch hrang hrang te chuan  District Hospital, Hnuchham leh Home hrang hrangahte Krismas pual hian thilpek an hlan ve nghal a. Branch hrang hrang te luanchhuahna hi a vaiin Cheng nuaih 7 (Rs. 7,00,000/-) chuang a ni.