3633/2024-2025

Dated Lawngtlai, 20th December 2024 : Vawiin khan DC Conference Hall- ah Pu Cheemala Siva Gopal Reddy, IAS, Lawngtlai Bawrhsap kaihhruaiin  'Good Governance Week 2024' hawnna neih a ni a, 'Workshop on Good Governance Practices' neih nghal a ni bawk.

Pu Cheemala Siva Gopal Reddy chuan kal khawmte hnena lawmthu sawina a nei hmasa a. Good Governance-  a tak a kalpui turin sawrkar hnathawkte an pawimawh hle tih sawiin Bawrhsap chuan mipuite tana thawk an nihna hre reng turin a chah a. Sawrkar Office dawrtu mipuite lo dawngsawn kawngah  hawihhawmna, dawhtheihna leh inngaihtlawmna nun neih a tul hle a ti. A bik takin kum upa leh rualbanlote chu duat zual an ngai hle a, puih theihna kawngah theihtawp chhuah a  puih a tul zual hle a ti.

Bawrhsap  chuan  Lawngtlai district bikah 'Citizen Care- Grievance Redressal Day (Khua leh tuite ngaihsak-Harsatna chin fel ni)'  thla tin hma thin a nih thu a tarlang a. Hei hi 'Good Governance ' a tak a kalpuina tha leh tangkai tak a ni tiin, hmalam hunah pawh kalpui zel a nih tur  thu a sawi. Sawrkar tha leh langtlang siam turin  sawrkar hnathawk zawng zawngten mawhphurhna sang tak an nei tih sawiin Pu Cheemala Siva Gopal Reddy chuan 'Good Governance Week 2024' hlawhtlina tura theihtawp chhuah turin kalkhawmte a sawm nghal bawk.

Dr. Saithantluangi Zote, SDC chuan 'Good Governance Practices' chungchangah zirtirna a pe a. Thupui hrang hrang -The  Mizoram Right to Public Services Act, 2015, Result Framework Document (RDF), Citizen's Charter, Mipui Aw, Self Certification, Community Policing leh Sanitation through Public Participation, hmangin zirhona neih a ni.

Vawiin 'Good Governance Week 2024' hawnna leh  'Workshop on Good Governance Practices' hunah hian Lawngtlai district-a Head of Department leh sawrkar hnathawkte an kal tha hle a. Pu Zonunchama Ralte, DIPRO, chuan lawmthu sawina neiin hun a khar.

Sawrkarlaipuiin ruahmanna a siam  angin 'Good Governance Week 2024'  hi thupui thlan " Prashasan Gaon Ki Ore (Taking Administration to Villages) " tih hmangin, 19th - 24th December, 2024 chhung hman a ni ang.