Vawiin khan Transport Minister Pu P.C. Zoram Sangliana chuan Kolasib-ah Kualmawi atanga Hebron panna Lei, cheng nuai 18 senga dawh a hawng. Lei hi MLA fund cheng nuai thum-a bul tan phawt a ni a, chumi hnuah MGNREGS pawisa cheng nuai 15 sen belh lehin motor kaltlang theiha tha taka thawh zawh a ni.

Hawnna thu sawiin Pu Zoram Sangliana chuan, an sawrkar chu a taka hna thawk thin, Vote zawn laia an thutiam ti puitlinga vawiin ni thlenga ram leh mipui tana thawktu a ni, a ti a. A bial mipuite chu politician te an thutiamah an ding em tih inzawt fo turin a chah a ni. Amah ngei pawh an sawrkar chhungin a bial chhunga a hnathawh te thlirlet thin tur leh mahni tanghma haia contract leh supply a thawh leh thawh lohte chik fo turin a sawm bawk.

Pu Lal Thanhawla sawrkar chuan mi retheite intun nunna leh an inkhaichhuahna tur hi a thil ngaih pawimawh ber a ni a. Chumi atana NLUP a kalpui mek chu ngawrh taka kalpui a niin mi tamtakin mual eng hmuin eizawnna tha tak an nei chho mek zel a. 3rd Phase kalpui turin kan inpuah chah chho mek a. Sawrkar anga tihtur tha taka tih a nihlai hian mipui lamin tihtur thui tak kan nei a ni, a ti a. Sawrkar chuan Plan te hi tangkai leh hlawk taka hman a tum a, ram neilo pui nei anga inziah te hi kan bansan mek ta zel a ni, a ti bawk.

Vawiina Lei hawn tak hi March 2011 khan thawh tan a ni a. March 22, 2012 khan thawh zawh a ni. Lei hi 12. 8 metres a sei a ni a, 5.3 metres a zau a ni. Lung remin a sir tawn tawnah do a ni a, motor tlan tlang theih niin inkalpawhna tha tak a ni.

Hawnna inkhawm Leilawn hmuna neih hi Pu Stephen L. Auhmun-in a kaihruai a. Pi Maria CT. Zuali, Project Director, DRDA leh Department aiawh thenkhat te he hunah hian an tel a ni.