Vawiin Dt 11th December 2012 hian DC’s Conference Hall, Mamit-ah kumin 2012 Krismas leh Kumthar 2013 mipuiten hlim taka an hman theih dan tur Pu V. Lalremthanga IAS District Bawrhsap hovin rel a ni.

District Bawrhsap chuan mitinte’n Krismas leh kumthar hlim taka hman anih theih nan Sorkar chuan ruahmanna a siam thin thu tarlangin Mamit-ah pawh ruahmanna kan siam a tul a ni tiin heta mawhphurtu tura kan ruatte pawhin kan chanpual theuh kan hlen theih nan theihtawp kan chhuah a ngai dawn a ni, a ti bawk.

He mizote hun pui lo thleng tur hlim leh lawm taka kan hman theuh theih nan ruahmanna hrang hrang committee chuan a duang a- Zu leh ruihhlo dangte laka kan fihlim theih nan Kanhmun, Suarhliap, Tuidam leh Dampui-ah te Check Post siam ni se, Halpuah leh Halmawi lam chi reng reng hal lo tur leh zuar lo tura khap ni se, naupang silai lem a mu kapchhuak thei chi hman hralh leh zawrh khap ni se, hei bakah hian Mamit khawpui chhung veng hrang hrangah YMA hmalakna-in Duty Post siam ni se, tih te rel a ni bawk a. Krismas leh Kumthar vuakveta dan bawhchhia hriat angte thuneitute hnenah hriattir zel ni se tihte leh hetiang case avanga mante chu an chhuah leh theihna tura in sawipui loh ni se tihte rel a ni bawk.

He meetingah hian Mamit khawpui chhunga Heads of Offices te, khawtlang hruaitute leh Tlawmngai pawl hruaitute bakah thuthar thehdarhtute an tel tha hle a ni.