Mizoram University hnuaia College hrang hrang atanga kumin 2014 a graduate exam Arts, Science leh Commerce Stream a ti tha ber, toppers chawimawina Mizo Students Union General Headquarters,Aizawl in vawiina Vanapa Halla- a buatsaihah Chief Minister chuan hmanpuiin, chawimawina thilpekte a hlan.

Chief Minister chuan zirna ngaihpawimawh avanga hetiang chawimawi tlakte chawimawi nachang MSU in an hria chu a lawmawm tak zet a ni a ti a. Thil tha hi kan duh vek a, amaherawhchu thahnemngaihna a inchen loh thin avangin zirlai hruaitute nen pawh thu a inkalh chang a awm thin a ni a ti a. Graduate toppers te tan khawvel a in tan dawn chauh a, la zir zel tur an nih avangin rual elna thinlung pu theuh turin Chief Minister chuan a chah a. Zirlaite chu ram leh hnam tana mi tangkai ni tur leh midangte tana malsawmna ni turin ringtu an nihna chu rim taka hmang thin turin a fuih a ni.

Chief Minister chuan zirlaite hi nakin a ram hruaitu tur an ni kan tih thin hi, zirlai tha, thuawi thei, mi insum thei leh aia upate zah thiam te chauh hi ram hruaitu an la ni thei a ni a ti a. Pathian hi kan lama tang tura kan duh chuan Ama lama kan tan hmasak a ngai a ni tiin, Bible in mi fing a tihte hi Pathian tihtute vek an ni tih hi zirlai ten hria se a duh thu a sawi a. Chief Minister chuan zirna tha chungchuang kan duh avangin sorkarin Education Reforms Commission din a ni tiin, ti puitling turin sum cheng vaibelchhe 700 chuang a mamawh a, hei hi hmuh mai theih anih loh avangin a kawng kan dap reng a ni a ti a. Hnam zahawm nih hi kan duh ber a ni tiin, Pu Lal Thanhawla chuan hetiang ni thei tur hian ei leh barah leh sum leh paiah kan intodelh a ngai a, chumi nei thei tur chuan sorkarin theihtawp chhuahin kawng tinrengin hma ala reng a ni a ti.

Zohnahthlakte insuihkhawm chungchangah Chief Minister chuan Pathianin hun a tihah chuan rorelna khatah min la dah ngei ang a ti a. Lusei tawng, Mizo tawng kan tih bawk hi Zohnahthlak zawng zawng ten hmang ve thei kherlo mahse an hrethiam vek a ni a ti a. Chanchintha kan hril chhung chu midangte chimral theihin kan awm ka ringlo a ni a ti.

Chief Minister chuan chawimawi toppers te chungah leh an nu leh pa te chungah lawmthu sawiin, an zir zelna turah duhsakna a hlan a ni.

Toppers chawimawi te hi an vaiin 19 (mipa 7 leh hmeichhia 12) an ni a, college hrang hrang PUC - 13, HBC -2, GAC -1, T.Romana College - 1, GZRSC - 2, leh HATIM Lunglei -1 te an ni.

Chawimawina inkhawm hi MSU General Headquarters Vice President Pu Lalrinhlua'n a kaihruai a, chawimawina hi vawi 6 an buatsaihna anih thu a sawi bawk a ni.

MSU General Headquarters President Pu Zodinpuia chuan Toppers te chawimawina hun an buatsaih chhan sawiin, an zir zawh huna Mizoram tana inpe tur leh inhmang tura an hauhna a ni a ti a. Chawimawina thilpek an buatsaihte pawh zirna lama mithahnemngaite thawhkhawm atanga buatsaih anih thu a sawi bawk.

Subject hrang hranga chawimawina buatsaihte hi zirna lama subject hrang hranga mi hmasate hming chawia buatsaih a ni. Mathematics subject a chawimawina chu Dr.L.N.Tluanga Award tih a ni.