Kolasib district chhunga sorkar laipui scheme hnuaia hnathawh dan tur duan hrang hrang te thlirhovin vawiin khan District  Development Coordination  and Monitoring Committee (DISHA) chu an chairman Pu CL Ruala, MP Lok Sabha hovin DC Conference Hall, Kolasib-ah an thukhawm. 

Meeting-ah hian Kolasib district chhunga sorkar laipui scheme hnuaia kum 2017-18 chhunga hmalakna tur hrang hrang sawiho zinga langsar zualte: 

Swachh Bharat Mission (Gramin) hnuaiah ekin thianghlim tawklo 1225  thianghlim zawka siamna turin in pakhat tan Rs.5,000/- theuh ruahman a ni a. Hei hi thawh thuai beisei a ni a. Bawlhlawh sawngbawlna ‘Solid & Liquid Waste Management’ hmun tur khaw 20 ah siam tura ruahmanna siam a ni a. Swachh Bharat Mission (Urban) hnuaiah chuan Bairabi-ah ekin thianghlim zawk siam hna thawh mek zel a ni a, in 70 tan siam niin, zawh thuai beisei a ni. 

National Rural Drinking Water Programme (NRDWP) hnuaiah khaw pali : N.Chaltlang, Lungmuat, Thingthelh leh Khamrang; ah Water Supply Scheme hnathawh chhoh mek zel a ni a, thawh zawh thuai beisei a ni. 

Sarva Shiksha Ab hiyan (SSA) hnuaiah naupang school lutlo zawn chhuah a, school lut tura buatsaihna hmun tur Residential Training Centre 3 leh Non-Residential Special Training Centre 9 atan Rs.66.36 lacs ruahman a ni a. Naupang abika enkawl ngaihsak ngai te enkawlna turin Rs.7.02lacs ruahman a ni a. Heng sum ruahman te hi sorkar laipui pawmpuina nghah mek a ni. Kum 2018-19 atan school uniform naupang 8849 hnenah leh zirlaibu naupang 9554 hnena sem turin ruahmanna siam a ni a. Mid Day Meal school 178 tana pekah ruahman a ni a. Chawchhum tu mi 373 chhawr leh tura ruahman a ni bawk a. State dangin chawchhum lawmman sorkar laipuiin a duan ang Rs.1000/- an pek laiin, Mizoram sorkar chuan Rs.500/- thawhbelhin Rs.1,500/- pek a ni a.               

Kolasib district-ah HIV+ leh AIDS vei an pung zel ni a hriat avangin, inzirtirna uar zawka hmandan tur duan niin, kohhran, khawtlang  leh pawl hrang hrangah zirtirna tam zawk pek tum a ni a. Heng hmalakna atan hian nikum khan bialtu MLA pathum ten Rs.1lac theuh an lo thawh tawh a ni. ART Centre District Hospital, Kolasib ah din a nih tawh avangin Aizawl pan kher ngailovin inenkawlna a lak theih tawh dawn a ni. Doctor awmlohna khuaah Mobile Medical Unit chu kumin chhungin vawi 20 tal intirhchhuah leh tum a ni a. National Programme For Prevention and Control of Cancer, Diabetes, Stroke and Cardiovascular Diseases (NPCDCS) hnuaiah NCD Clinic Public Health Community Centre ah vawi nga leh Community Health Centre-ah vawikhat neih tura ruahman a ni a. Hei bakah hian Subcenter 10 ah neih beisei bawk a ni. Naupang mit endik turin school 78 tlawh tum a ni bawk. 

Pradhan Mantri Awas Yojana (PMAY)- Housing For All (Urban) hnuaiah pawisa faia pek tur (Beneficiary led construction) dilna 4467 lut tawhin, heng te hi endik tawh an ni a. A dawng tur thlang tur hian District Screening Committee an thukhawm ang. A pung tlem (6.5%) a insakna tur Credit link subsidy scheme hnuaiah diltu 882 zingah 70 thlanchhuah tura ruahman a ni. 

Thingtlang khua tin ten electric eng an neih ve theihna tur Deendayal Upadhaya Gram Jyoti Yojana (DDUGJY) hnuaiah khaw 5 : Dilzau ‘H’, Sakeihmun, Hortoki Khawthar, Zaihrikawn leh Lungdai Zauou; ah 11kv line siam tura hmalak mek a ni a. A siam hna hi Satnam Global Infroprojects Ltd. Patparganj, Delhi ten an thawk dawn a ni. 

Heng bakah hian sum hmuh dan azira siam rem chi scheme hrang hrang te pawh meeting-ah hian sawiho a ni bawk. 

Meeting-ah hian Chairman Pu CL Ruala chuan district officer te sorkar hmalakna hrang hrang tihhlawhtlingtu an ni tih inhria a, thahnemngai tur leh khawtlang hruaitute thawhpui thiam turin  a chah a. Ram hmasawnna chu district a hmalakna hian a hril thui hle a ni a ti. Meeting-ah hian bialtu MLA pathum te : Tuirial bialtu Pu Hmingdailova Khiangte, Kolasib bialtu Pu PC Zoram Sangliana leh Serlui bialtu Pu K.Lalrinthanga te an tel a  ni.